തിരുവനന്തപുരം: അഡ്വ.എം.കെ ദാമോദരനെതിരേ ഗുരുതര ആരോപണങ്ങളുന്നയിച്ച് 2007 ജൂലൈയില്‍ വി.എസ് അച്യുതാനന്ദന്‍ എഴുതിയ കത്ത് വീണ്ടും ചര്‍ച്ചയാകുന്നു. പിണറായി വിജയന്‍ സി.പി.എം സംസ്ഥാന സെക്രട്ടറിയായിരിക്കേ പാര്‍ട്ടി ജനറല്‍ സെക്രട്ടറി പ്രകാശ് കാരാട്ടിനെഴുതിയ കത്താണ് വീണ്ടും വിവാദങ്ങളിലേക്ക് വഴിതുറക്കുന്നത്. ഹൈക്കോടതിയില്‍ കേസുകള്‍ വഴിവിട്ടരീതിയില്‍ ഒത്തുതീര്‍ക്കുന്ന ആളാണ് ദാമോദരന്‍ എന്നാണ് വി.എസിന്റെ കത്തിലെ ഗുരുതര ആരോപണം. ലിസ് തട്ടിപ്പ്, ഐസ്‌ക്രീം പാര്‍ലര്‍ കേസുകള്‍  അട്ടിമറിച്ചെന്നും ദാമോദരന്‍ കേസുകള്‍ ഫിക്‌സ് ചെയ്യുന്ന ആളാണെന്നും കത്തില്‍ ആരോപിക്കുന്നു.

അഞ്ഞൂറുകോടിരൂപയുടെ ലിസ് കുംഭകോണത്തില്‍ പ്രതികളെ രക്ഷിക്കാനും അവര്‍ക്ക് വീണ്ടും തട്ടിപ്പു നടത്താനും പാര്‍ട്ടി നേതൃത്വവും ദാമോദരനും ഒത്താശ ചെയ്തു. അന്നത്തെ പാര്‍ട്ടി സംസ്ഥാനനേതൃത്വത്തെ അഴിമതിക്കാരെന്നു നേരിട്ട് ആക്ഷേപിക്കുന്ന കത്തില്‍ അവരുടെ പിണിയാളാണ് എം.കെ.ദാമോദരനെന്നും വി.എസ് കുറ്റപ്പെടുത്തുന്നു. ഐസ്‌ക്രീം പാര്‍ലര്‍ കേസില്‍ പി.കെ.കുഞ്ഞാലിക്കുട്ടിയെ രക്ഷിക്കാന്‍ സര്‍ക്കാരിനു തെറ്റായ നിയമോപദേശം നല്‍കിയെന്നും ലിസ് കേസില്‍ നിന്ന് ജസ്റ്റിസ് കെ.ടി.ശങ്കരനെ ഒഴിവാക്കാന്‍ അദ്ദേഹത്തിന്റെ ജൂനിയറായിരുന്ന അഭിഭാഷകനെ കൂടെച്ചേര്‍ത്തുവെന്നും കത്തിലുണ്ട്. എല്ലാ മാഫിയകളും കുറ്റകൃത്യങ്ങള്‍ ചെയ്തശേഷം രക്ഷയ്ക്കായി ദാമോദരനെയാണ് സമീപിക്കുന്നത്. അനധികൃതലോട്ടറിക്കാര്‍, മൂന്നാറിലെ കൈയേറ്റക്കാര്‍, ഡിവൈന്‍ ധ്യാനകേന്ദ്രം തുടങ്ങിയ സ്ഥാപിതതാല്‍പ്പര്യക്കാരാണ് ദാമോദരന്റെ കക്ഷികളില്‍ ഏറെയുമെന്നും വി.എസ് ആരോപിക്കുന്നുണ്ട്.

അതേസമയം, ഐസ്‌ക്രീം പാര്‍ലര്‍ കേസില്‍ വി.എസ്.അച്യുതാനന്ദന്‍ സുപ്രിം കോടതിയില്‍ നല്‍കിയ ഹരജി തള്ളിയതിനു ശേഷമാണു തനിക്കെതിരേ സംഘടിത നീക്കം ഉണ്ടായതെന്നും താന്‍ മുഖ്യമന്ത്രിയുടെ നിയമോപദേശക സ്ഥാനം ഏറ്റെടുക്കാതിരിക്കാന്‍ ഉന്നതതലത്തിലുള്ള ഇടപെടല്‍ നടന്നതായും കഴിഞ്ഞദിവസം എം.കെ ദാമോദരന്‍ ആരോപിച്ചിരുന്നു.