ചെന്നൈ: സൂപ്പര്‍ സ്റ്റാര്‍ രജനികാന്തിന്റെ ബ്രഹ്മാണ്ഡചിത്രം കബാലി ചെന്നൈയിലും കേരളത്തിലും ഇന്നു പുറത്തിറങ്ങാനിരിക്കെ സിനിമയിലെ ചില രംഗങ്ങള്‍ പുറത്തായെന്ന് വാര്‍ത്ത.

ചിത്രത്തിന്റെ ആദ്യ രംഗങ്ങള്‍ ഇന്റര്‍നെറ്റിലൂടെയും വാട്‌സ് ആപ്പിലൂടെയും പ്രചരിക്കുകയാണ്. രണ്ടു മിനുട്ട് ദൈര്‍ഘ്യമുള്ള ദൃശ്യങ്ങളാണ് ഇത്തരത്തില്‍ പ്രചരിക്കുന്നത്. എന്നാല്‍  സിനിമ ചോര്‍ന്നെന്ന അഭ്യൂഹങ്ങള്‍ നിര്‍മാതാവ് കലൈപുലി എസ്.തനു നിഷേധിച്ചിട്ടുണ്ട്. ചിത്രം ലഭ്യമാവാന്‍ സാധ്യതയുള്ള നൂറ് വെബ്‌സൈറ്റുകള്‍ ബ്‌ളോക്ക് ചെയ്തിട്ടുണ്ടെന്നും അദ്ദേഹം പറഞ്ഞു.

ജയിലില്‍ നിന്ന് മടങ്ങിയെത്തുന്ന അധോലോക രാജാവിന്റെ  വേഷമാണ് കബാലിയില്‍ രജിനികാന്ത് അവതരിപ്പിക്കുന്നത്. ലോകത്താകമാനം അയ്യായിരം സ്‌ക്രീനുകളിലാണ് പടം പുറത്തിറങ്ങുന്നത്. വിദേശങ്ങളില്‍ ഇന്നലെ പടം പുറത്തിറങ്ങി. ആദ്യ മൂന്നു ദിവസത്തിനുള്ളില്‍ നൂറു കോടിയുടെ കലക്ഷനാണ് പ്രതീഷിക്കുന്നത്.