പനാജി: പ്രീമിയര്‍ ഫുട്‌സാലിലെ നിര്‍ണായക പോരില്‍ ബംഗളൂരു ഫൈവ്‌സിനെ എതിരില്ലാത്ത മൂന്നു ഗോളിന് തകര്‍ത്ത് ഗോവ ഫൈവ്‌സ് സെമിയില്‍ കടന്നു. റൊണാള്‍ഡീഞ്ഞോയ്ക്ക് പകരം ടീമിലെത്തിയ ലോകകപ്പ് നേടിയ ബ്രസീല്‍ ടീം നായകന്‍ കഫുവാണ് ഗോവയുടെ വിജയശില്‍പി. മൈക്കല്‍ സില്‍വ, റാഫേല്‍, വാംപെറ്റ എന്നിവര്‍ ഗോവയ്ക്കായി സ്‌കോര്‍ ചെയ്തു. ആദ്യ ഗോളിന് വഴിയൊരുക്കിയത് കഫുവാണ്. റാഫേലാണ് മത്സരത്തിലെ താരം.

ബംഗളൂരുവിനെതിരേ സമനില നേടിയാല്‍ സെമിയിലെത്താമായിരുന്നു ഗോവയ്ക്ക്. മറുവശത്ത് ഗോവയ്‌ക്കെതിരേ ജയത്തില്‍ കുറഞ്ഞതൊന്നും ബംഗളൂരുവിനെ സെമിയിലെത്തിക്കില്ലായിരുന്നു. ഇരുടീമുകളും മികവോടെയാണ് കളിച്ചത്. ഇഞ്ചോടിഞ്ച് പോരാട്ടം കാഴ്ച്ചവച്ച ടീമുകള്‍ പലപ്പോഴും ഗോളിനടുത്തെത്തിയിരുന്നു. ഇതിനിടെ ബംഗളൂരുവിന്റെ പ്രതിരോധം മുതലെടുത്ത ഗോവ ആദ്യ ഗോള്‍ നേടി. കഫുവിന്റെ മികച്ചൊരു ഷോട്ട് ബംഗളൂരു പ്രതിരോധം തടഞ്ഞെങ്കിലും റീബൗണ്ടില്‍ പന്ത് ലഭിച്ച  മൈക്കല്‍ സില്‍വ പന്ത് ലക്ഷ്യത്തിലെത്തിക്കുകയായിരുന്നു. ഇതോടെ ബംഗളൂരു പ്രതിരോധത്തിലേക്ക് വലിഞ്ഞു. സ്‌കോള്‍സ് ചില നീക്കങ്ങള്‍ നടത്തിയെങ്കിലും ലക്ഷ്യം കണ്ടില്ല. രണ്ടാം ക്വാര്‍ട്ടറില്‍ ജൊനാഥന് സ്‌കോര്‍ തുല്യതയിലെത്തിക്കാന്‍ സുവര്‍ണാവസരം ലഭിച്ചെങ്കിലും താരത്തിന്റെ ഹെഡ്ഡര്‍ പുറത്തേക്ക് പോയി. പിന്നീട് അവസരങ്ങള്‍ മുതലെടുക്കാന്‍ ഇരുടീമുകള്‍ക്കും സാധിച്ചില്ല.

മൂന്നാം ക്വാര്‍ട്ടറില്‍ ബംഗളൂരുവിന്റെ പ്രതിരോധം കൂടുതല്‍ ദുര്‍ബലമായി. ഗോവയുടെ നിരന്തര നീക്കങ്ങളാണ് ടീമിന്റെ രണ്ടാം ഗോളിലേക്ക് നയിച്ചത്. റാഫേലിന്റെ മികച്ച മുന്നേറ്റം തടയുന്നതില്‍ ബംഗളൂരു പ്രതിരോധം ദയനീയമായി പരാജയപ്പെടുന്നതാണ് കണ്ടത്. അനായാസമാണ് താരം ഗോള്‍ നേടിയത്. സ്‌കോള്‍സിന്റെ ഒറ്റയാന്‍ നീക്കങ്ങള്‍ മികച്ചു നീന്നെങ്കിലും എതിര്‍ താരങ്ങളില്‍ നിന്ന് പിന്തുണ ലഭിച്ചില്ല. അവസാന ക്വാര്‍ട്ടറില്‍ ജയമുറപ്പിച്ച ഗോവ കൗണ്ടര്‍ അറ്റാക്കുകള്‍ നടത്തി. മികച്ചൊരു സ്‌പോട്ട് കിക്കിലൂടെ വാംപെറ്റ കൂടി സ്‌കോര്‍ ചെയ്തതോടെ വമ്പന്‍ ജയത്തോടെ സെമിയിലേക്ക് മുന്നേറുകയായിരുന്നു. ഗോവ.

അതേസമയം ഇന്നലെ നടന്ന ഗ്രൂപ്പ് ഘട്ട അവസാന മത്സരത്തില്‍ ചെന്നൈ ഫൈവ്‌സിനെ  3-3ന് സമനിലയില്‍ കുരുക്കി കൊച്ചി ഫൈവ്‌സ് സെമിയില്‍ കടന്നു. കഴിഞ്ഞ ദിവസം കൊച്ചി മുംബൈയോട് പരാജയപ്പെട്ടതോടെ അവസാന മത്സരത്തില്‍ ജയിച്ചാല്‍ സെമിയിലെത്താമെന്ന അവസ്ഥയിലായിരുന്നു ചെന്നൈ. തുടക്കത്തില്‍ മികവോടെയാണ് ചെന്നൈ കളിച്ചത്. ആദ്യ ക്വാര്‍ട്ടറില്‍ ചെന്നൈ നിരന്തരം ആക്രമണം നടത്തിയപ്പോള്‍ കൊച്ചിക്ക് മുന്നേറ്റങ്ങളൊന്നും നടത്താന്‍ സാധിച്ചില്ല. എന്നാല്‍ രണ്ടാം ക്വാര്‍ട്ടറില്‍ കൊച്ചിയുടെ പ്രതിരോധത്തെ അവര്‍ ഭേദിച്ചു.

കാമിലോയുടെ തകര്‍പ്പനൊരു ഷോട്ട് വല കുലുക്കുകയായിരുന്നു. രണ്ടാം ക്വാര്‍ട്ടര്‍ അവസാനിക്കാനിരിക്കെ ചെന്നൈ ലീഡ് ഉയര്‍ത്തി. ടീമിന് ലഭിച്ച കോര്‍ണറില്‍ നന്ദയാണ് സ്‌കോര്‍ ചെയ്തത്. എന്നാല്‍ വമ്പന്‍ തോല്‍വി വഴങ്ങാതിരുന്നാല്‍ സെമി സാധ്യത സജീവമായി നിര്‍ത്താന്‍ സാധിക്കുമെന്നുറപ്പുള്ള കൊച്ചി ഗോള്‍ തിരിച്ചടിക്കാന്‍ എല്ലാ മികവും പുറത്തെടുത്തു. എന്നാല്‍ മൂന്നു ക്വാര്‍ട്ടര്‍ അവസാനിച്ചപ്പോഴും രണ്ടു ഗോളിന് പിന്നില്‍ നില്‍ക്കുകയായിരുന്നു.

എന്നാല്‍ ജയമുറപ്പിച്ച രീതിയില്‍ കളിച്ച ചെന്നൈക്ക് നാലാം ക്വാര്‍ട്ടറില്‍ മറുപടി നല്‍കാന്‍ കൊച്ചിക്കായി. തുടരെ രണ്ടു ഗോള്‍ നേടി ചെന്നൈക്ക് ഒപ്പമെത്താന്‍ കൊച്ചിക്ക് സാധിച്ചു. മോറിസും ചാഗ്വിനയുമായിരുന്നു സ്‌കോറര്‍മാര്‍. റൊമുലോ ഒരു ഗോള്‍ മടക്കി ചെന്നൈയെ വീണ്ടും മുന്നിലെത്തിച്ചെങ്കിലും ചാഗ്വിന അവസാനം നേടിയ ഗോള്‍ കൊച്ചിക്ക് സമനില സമ്മാനിക്കുകയായിരുന്നു.