പെരളശ്ശേരി: വാഹനങ്ങളെയും യാത്രക്കാരെയും ഉള്‍ക്കൊള്ളാനാകാതെ സ്ഥലപരിമിതിയില്‍ വീര്‍പ്പുമുട്ടി പെരളശ്ശേരി ടൗണ്‍. കണ്ണൂര്‍-കൂത്തുപറമ്പ് റൂട്ടിലെ പ്രധാന ടൗണായ പെരളശ്ശേശരി കഴിഞ്ഞ കുറേ വര്‍ഷങ്ങളായി ഈ പ്രശ്‌നം നേരിടുന്നുണ്ടെങ്കിലും പരിഹരിക്കാന്‍ യാതൊരു നടപടികളുമുണ്ടായിട്ടില്ല.
പെരളശ്ശേരി അമ്പലത്തിലേക്ക് നാടിന്റെ പലഭാഗത്തുനിന്ന് നിരവധിയാളുകളാണ് എത്തുന്നത്. അതിനാല്‍ സ്ഥലപരിമിതി കാരണം ജങ്ഷനില്‍ ഗതാഗതസ്തംഭനം പതിവായിരിക്കുകയാണ്. തലശ്ശേരി-ചക്കരക്കല്‍, കണ്ണൂര്‍-കൂത്തുപറമ്പ് തുടങ്ങിയ റൂട്ടുകളിലെ ബസുകളും ഈ ടൗണ്‍ വഴിയാണ് കടന്നുപോകുന്നത്. ബസുകള്‍ യാത്രക്കാരെ കയറ്റി ഇറക്കുന്നതിന് റോഡരികില്‍ നിര്‍ത്തുന്നതാണ് ഗതാഗത സ്തംഭനത്തിന് പ്രധാന കാരണം. കൂടാതെ ഓട്ടോ-ജീപ്പ് സ്റ്റാന്‍ഡുകളും ഈ ടൗണില്‍ തന്നെയാണ്.
പെരളശ്ശേരി ടൗണില്‍ ബസ് സ്റ്റാന്‍ഡ് വേണമെന്ന ആവശ്യം വര്‍ഷങ്ങള്‍ മുന്‍പേ ഉയര്‍ന്നിരുന്നു. ബസ് സ്റ്റാന്‍ഡ് നിലവില്‍ വന്നാല്‍ ഒരുപരിധി വരെ ഗതാഗത സ്തംഭനം ഒഴിവാക്കാനാകുമെന്നാണ് നാട്ടുകാര്‍ പറയുന്നത്. ബസ് സ്റ്റാന്‍ഡ് നിര്‍മാണത്തിന് വേണ്ട നടപടികള്‍ വേഗത്തിലാക്കണമെന്നാണ് നാട്ടുകാരുടെ ആവശ്യം.