മക്കിയാട്: ആളില്ലാത്ത വീട്ടില്‍ പട്ടാപ്പകല്‍ മോഷണം. മോഷ്ടാക്കള്‍ 25 പവന്‍ സ്വര്‍ണ്ണവും 15,000 രൂപയും അപഹരിച്ചു. തൊണ്ടര്‍നാട് വഞ്ഞോട് എല്‍.പി. സ്‌കൂള്‍ അധ്യാപകനായ എം.പി കുഞ്ഞിക്കണ്ണന്റെ വീട്ടിലാണ് മോഷണം നടന്നത്. ബുധനാഴ്ച്ച കുഞ്ഞിക്കണ്ണനും അധ്യാപികയായ ഭാര്യ ഇന്ദിരയും സ്‌കൂളില്‍ പോയി തിരികെയെത്തിയപ്പോഴാണ് വീടിനുമുമ്പിലെ ഇരുമ്പ് ഗ്രില്‍ വളച്ച് മോഷ്ടാവ് അകത്തുകടന്ന് മോഷണം നടത്തിയതായി കണ്ടെത്തിയത്. വെള്ളമുണ്ട പോലീസില്‍ പരാതി നല്‍കിയതിന്റെ അടിസ്ഥാനത്തില്‍ മാനന്തവാടി സി.ഐ സജീവന്‍, വെള്ളമുണ്ട എസ്.ഐ ജോണി എന്നിവരുടെ നേതൃത്വത്തില്‍ പൊലീസെത്തി അന്വേഷണം ആരംഭിച്ചു. വിരലടയാള വിദഗ്ധരും, ഡോഗ് സ്‌ക്വാഡും സ്ഥലത്തെത്തി പരിശോധന നടത്തി.