കല്‍പ്പറ്റ: ഗവ. പ്‌ളീഡര്‍ പട്ടാപ്പകല്‍ യുവതിയെ അപമാനിച്ച സംഭവത്തിന്റെ വാര്‍ത്ത പ്രസിദ്ധീകരിച്ചതിന്റെ പേരില്‍ കൊച്ചിയില്‍ മാധ്യമ പ്രവര്‍ത്തകരെ മര്‍ദിച്ച ഒരു പറ്റം അഭിഭാഷകരുടെ നടപടിയില്‍ പ്രതിഷേധിച്ച് കെ.യു.ഡബ്ല്യു.ജെ ജില്ലാ കമ്മിറ്റിയുടെ നേതൃത്വത്തില്‍ ജില്ലയിലെ മാധ്യമ പ്രവര്‍ത്തകര്‍ കല്‍പ്പറ്റ കോടതിക്ക് മുമ്പിലേക്ക് മാര്‍ച്ച് നടത്തി.
വയനാട് പ്രസ് ക്ലബ് പരിസരത്ത് നിന്ന് ആരംഭിച്ച മാര്‍ച്ചില്‍ നൂറോളം മാധ്യമ പ്രവര്‍ത്തകര്‍ പങ്കെടുത്തു. കനത്ത മഴയെ അവഗണിച്ചാണ് മാധ്യമ പ്രവര്‍ത്തകര്‍ മാര്‍ച്ച് നടത്തിയത്.
കോടതി ഗേറ്റിനു മുമ്പില്‍ ചേര്‍ന്ന പ്രതിഷേധ യോഗം കേരള പത്രപ്രവര്‍ത്തക യൂണിയന്‍ മുന്‍ സംസ്ഥാന വൈസ് പ്രസിഡന്റ് വി.ജി വിജയന്‍ ഉദ്ഘാടനം ചെയ്തു. പ്രസ് ക്ലബ് പ്രസിഡന്റ് ബിനു ജോര്‍ജ് അധ്യക്ഷനായി.
ബാബു വടക്കേടത്ത് പുല്‍പ്പള്ളി, അശോകന്‍ ഒഴക്കോടി മാനന്തവാടി, രാജപ്പന്‍ പനമരം, അബു താഹിര്‍ ബത്തേരി, പ്രസ് ക്ലബ് സെക്രട്ടറി എ.എസ് ഗിരീഷ്‌കുമാര്‍ സംസാരിച്ചു.