കൊല്‍ക്കത്ത: സീസണിന്റെ തുടക്കത്തില്‍ മികച്ച പ്രകടനം നടത്തി അവസാനമായപ്പോഴേക്കും തകര്‍ന്ന് പോയ കൊല്‍ക്കത്ത ഇന്ന് സ്വന്തം തട്ടകത്തില്‍ മുംബൈ ഇന്ത്യന്‍സിനെ നേരിടുന്നു. അവസാനമായി കളിച്ച കഴിഞ്ഞ ആറ് മത്സരത്തിലും കൊല്‍ക്കത്ത ജയം കണ്ടിട്ടില്ല. തുടക്കത്തില്‍ ക്രിസ് ലിന്‍, ഉത്തപ്പ, റാണ, റസല്‍ എന്നിവരുടെ കരുത്തില്‍ കൊല്‍ക്കത്ത മികച്ച് നിന്നിരുന്നു. എന്നാല്‍ പിന്നീട് ടീം തകരുന്ന കാഴ്ചയായിരുന്നു കണ്ടത്. ടീമിന്റെ തുരുപ്പുചീട്ടായി അവതരിപ്പിച്ചിരുന്ന ആന്ദ്രെ റസല്‍ പൂര്‍ണ പരാജയമായത് തന്നെയായിരുന്നു കൊല്‍ക്കത്തയുടെ പരാജയത്തിന്റെ പ്രധാന കാരണം. ടീം റസലിനെ മാത്രം ആശ്രയിക്കുന്നു എന്ന അവസ്ഥയിലെത്തിയതോടെ റസല്‍ സമ്മര്‍ദത്തിലേക്ക് വീഴുകയായിരുന്നു. കൊല്‍ക്കത്തയുടെ അവസാന മത്സരത്തില്‍ എല്ലാവരും പരാജയമായപ്പോള്‍ ദിനേശ് കാര്‍ത്തികായിരുന്നു മുന്നില്‍നിന്ന് നയിച്ചത്. കാര്‍ത്തിക് 97 റണ്‍സ് നേടിയെങ്കിലും ടീമിനെ വിജയത്തിലെത്തിക്കാന്‍ താരത്തിന് കഴിഞ്ഞില്ല. നാല് പന്ത് ബാക്കി നില്‍ക്കെ മൂന്ന് വിക്കറ്റിനായിരുന്നു അന്ന് കൊല്‍ക്കത്തയുടെ തോല്‍വി. പട്ടികയില്‍ രണ്ടാം സ്ഥാനത്തുള്ള മുംബൈക്ക് കാര്യമായ വെല്ലുവിളികളൊന്നുമില്ല. 11 മത്സരത്തില്‍ നിന്ന് 14 പോയിന്റാണ് മുംബൈയുടെ സമ്പാദ്യം. ബാക്കിയുള്ള മൂന്ന് മത്സരങ്ങളില്‍ രണ്ടെണ്ണം വരുതിയിലാക്കിയാല്‍ മുംബൈക്ക് പേടിക്കാനില്ല.