തളിപ്പറമ്പ്: തളിപ്പറമ്പിലും പരിസരങ്ങളിലും കവര്‍ച്ച നടത്തിയ കേസില്‍ പ്രതിയെന്നു പൊലിസ് സംശയിക്കുന്ന കുപ്രസിദ്ധ മോഷ്ടാവ് തൊരപ്പന്‍ സന്തോഷ് പിടിയിലായി. കഴിഞ്ഞദിവസം രാത്രിയാണ് ശ്രീകണ്ഠപുരം സമുദ്ര ബിയര്‍ പാര്‍ലറില്‍ വച്ച് ഇയാള്‍ പൊലിസിന്റെ വലയിലായത്. ഇടുക്കി, തമിഴ്‌നാട് സ്വദേശികളായ രണ്ടു പേര്‍ കൂടി ഇയാളോടൊപ്പം പിടിയിലായിട്ടുണ്ട്. സംസ്ഥാനത്ത് മിക്ക സ്ഥലങ്ങളിലും കവര്‍ച്ച നടത്തിയിട്ടുള്ള സന്തോഷ് അരീക്കാമല സ്വദേശിയാണ്. കവര്‍ച്ച നടത്തി കിട്ടുന്ന പണം കൊണ്ട് ആര്‍ഭാട ജീവിതം നയിക്കാറാണ് പതിവ്. സന്തോഷിനെയും സംഘത്തെയും പൊലിസ് ചോദ്യം ചെയ്തു വരികയാണ്. അറസ്റ്റ് ഇന്ന് രേഖപ്പെടുത്തിയേക്കും.