ചെറുപുഴ: ചുണ്ടയില്‍ വയോധികയെ മര്‍ദിച്ച് വായില്‍ തുണി തിരുകി കഴുത്തിലുണ്ടായിരുന്ന അഞ്ച് പവന്‍ മാല മോഷ്ടിച്ചു. ചുണ്ടവിളക്കു വട്ടം റോഡിലെ പാലങ്ങാട്ട് മാണിയമ്മയാണ്(80) മോഷണത്തിനിരയായത്. ബുധനാഴ്ച സന്ധ്യയ്ക്ക്ക്ക് വിളക്ക് വച്ചതിന് ശേഷം വീട്ടു മുറ്റത്തേക്ക് വന്ന മാണിയമ്മയെ മുഖംമൂടി ധരിച്ച മോഷ്ടാവ് കഴുത്തില്‍ കുത്തിപ്പിടിക്കുകയും തലയ്ക്ക് മര്‍ദിക്കുകയും ചെയ്തുവത്രെ. ബഹളമുണ്ടാക്കാന്‍ ശ്രമിച്ച മാണിയമ്മയുടെ വായില്‍ തുണി തിരുകി കയറ്റുകയും കഴുത്തിലുണ്ടായിരുന്ന മാല പൊട്ടിക്കുകയും ചെയ്തതായി ഇവര്‍ പറഞ്ഞു. പാടിയോട്ടുചാലില്‍ കച്ചവടം നടത്തുന്ന മകന്‍ രാത്രി വരുന്നതുവരെ ഇവര്‍ വീട്ടില്‍ ഒറ്റയ്ക്കാണ്. ചെറുപുഴ പൊലിസ് സ്ഥലത്തെത്തി അന്വേഷണം ആരംഭിച്ചു.