കൊണ്ടോട്ടി: വിദേശത്തേക്കു കടത്താന്‍ കൊണ്ടുവന്ന 1.5 കിലോ കഞ്ചാവുമായി ഒരാള്‍ കൊണ്ടോട്ടിയില്‍ പിടിയിലായി. അരീക്കോട് പൂവ്വത്തിക്കല്‍ നൂഞ്ഞിമ്മല്‍ സമീറുദ്ദീന്‍(41) ആണ് പിടിയിലായത്. കരിപ്പൂര്‍ വിമാനത്താവളം വഴി വിദേശത്തേക്ക് മയക്കുമരുന്ന് കടത്ത് നടക്കുന്നതായി വിവരം ലഭിച്ചതിനെ തുടര്‍ന്ന് നടത്തിയ പരിശോധനയില്‍ ഇയാളെ കഞ്ചാവുമായി പിടികൂടുകയായിരുന്നു.
അടുത്തിടെ കരിപ്പൂര്‍ വഴി കഞ്ചാവ് കടത്തിയ നാലുപേര്‍ ഖത്തറില്‍ പിടിക്കപ്പെട്ട് ജയിലിലാണ്. ഇതേതുടര്‍ന്നാണ് വിമാനത്താവളം കേന്ദ്രീകരിച്ച് പൊലിസ് നിരീക്ഷണം ശക്തമാക്കിയത്. സമീറുദ്ദീനെ ചോദ്യം ചെയ്തതില്‍ നിന്ന് ഗള്‍ഫിലേക്ക് മയക്കുമരുന്ന് കടത്തുന്ന വലിയ സംഘത്തിന്റെ വിവരങ്ങള്‍ ലഭിച്ചിട്ടുണ്ട്. ഇവരെക്കുറിച്ച് നിരീക്ഷിച്ചുവരികയാണ്.
കഴിഞ്ഞ ദിവസം മേലാറ്റൂര്‍ സ്വദേശി ഷബീറിനെ ഒന്നരകിലോ കഞ്ചാവുമായി മഞ്ചേരിയില്‍ നിന്ന് പ്രത്യേക അന്വേഷണ സംഘം പിടികൂടിയിരുന്നു. ഇയാള്‍ക്കും സംഘവുമായി ബന്ധമുണ്ടെന്ന് പൊലിസ് പറഞ്ഞു. മലപ്പുറം ഡിവൈ.എസ്.പി ജലീല്‍ തോട്ടത്തിലിന്റെ നിര്‍ദേശപ്രകാരം കൊണ്ടോട്ടി സി.ഐ എം. മുഹമ്മദ് ഹനീഫ, എസ്.ഐ ജാബിര്‍, എ.എസ്.ഐ സന്തോഷ്, പ്രത്യേക അന്വേഷണ സംഘത്തിലെ കെ. അബ്ദുല്‍ അസീസ്, സത്യനാഥന്‍ മനാട്ട്, ശശി കുണ്ടറക്കാട്, സജീവ്, സലീം എന്നിവരടങ്ങുന്ന സംഘമാണ് പ്രതിയെ വലയിലാക്കിയത്.