കോഴിക്കോട്: സുപ്രഭാതവും പാലക്കാട് വോയേജ് ടൂര്‍സും സംയുക്തമായി സംഘടിപ്പിച്ച കഥാ മത്സരത്തില്‍ എം.എ ബൈജുവിന്റെ ഒരുകഥ ജനിക്കുന്ന വിധം സമ്മാനാര്‍ഹമായി. വിജയിക്ക് മലേഷ്യയിലേക്കുള്ള യാത്രയും ഫലകവുമാണ് പുരസ്‌കാരം.
കെ.എസ് രതീഷിന്റെ തുരുത്തോറ്റം കഥ രണ്ടാം സ്ഥാനവും ഫസീല മെഹറിന്റെ ജാതിത്തോല്‍വലയങ്ങള്‍ മൂന്നാം സ്ഥാനവും നേടി. രണ്ടും മൂന്നും സ്ഥാനങ്ങള്‍ നേടിയ കഥകള്‍ക്ക് കാഷ് അവാര്‍ഡും ഫലകവും നല്‍കും. മൂന്നു കഥകളും സുപ്രഭാതം വാര്‍ഷികപ്പതിപ്പില്‍ പ്രസിദ്ധീകരിക്കും. പ്രശസ്ത നിരൂപക ഡോ. മിനി പ്രസാദ്, യുവ കഥാകൃത്ത് അര്‍ഷാദ് ബത്തേരി എന്നിവരാണ് കഥകള്‍ തിരഞ്ഞടുത്തത്.
ഈ മാസം 31ന് വെള്ളിയാഴ്ച വൈകുന്നേരം നാലിന് കോഴിക്കോട് നടക്കുന്ന സുപ്രഭാതം വാര്‍ഷികപ്പതിപ്പിന്റെ പ്രകാശന ചടങ്ങില്‍ പ്രശസ്ത എഴുത്തുകാരന്‍ യു.എ ഖാദര്‍ പുരസ്‌കാരങ്ങള്‍ വിതരണം ചെയ്യും.