ലണ്ടന്‍: ഇന്ത്യയും ഇംഗ്ലണ്ടും തമ്മിലുള്ള നാലാം ടെസ്റ്റ് ഇന്ന് മുതല്‍ നടക്കും. ഇന്ത്യന്‍ സമയം വൈകിട്ട് മൂന്നിന് സതാംപ്ടണിലെ ദി റോസ് ബൗള്‍ സ്റ്റേഡിയത്തിലാണ് മത്സരം നടക്കുന്നത്.
ഇംഗ്ലണ്ട് പര്യടനത്തിലെ ആദ്യ രണ്ട് ടെസ്റ്റുകള്‍ ഇന്ത്യ ദയനീയമായി തോറ്റെങ്കിലും മൂന്നാം ടെസ്റ്റ് ഇന്ത്യ തിരിച്ചു പിടിക്കുകയായിരുന്നു. പരമ്പര കൈക്കലാക്കണമെങ്കില്‍ ഇനിയുള്ള രണ്ട് ടെസ്റ്റുകളിലും ഇന്ത്യക്ക് ജയിക്കേണ്ടി വരും. ആദ്യ ടെസ്റ്റില്‍ 31 റണ്‍സിനായിരുന്നു ഇന്ത്യ പരാജയപ്പെട്ടത്. രണ്ടാം ടെസ്റ്റില്‍ ഇന്നിങ്ങ്‌സിനും 159 റണ്‍സിനുമായിരുന്നു തോല്‍വി. എന്നാല്‍ രണ്ട് തോല്‍വികളില്‍ നിന്ന് പാഠം ഉള്‍ക്കൊണ്ട് മികച്ച ബൗളിങ് പ്രകടനം പുറത്തെടുത്തായിരുന്നു മൂന്നാം ടെസ്റ്റില്‍ ഇന്ത്യ ജയം സ്വന്തം വരുതിയിലാക്കിയത്.
203 റണ്‍സിനായിരുന്നു മൂന്നാം ടെസ്റ്റില്‍ ഇന്ത്യ ജയിച്ചത്. ഇനിയുള്ള രണ്ട് ടെസ്റ്റും ജയിക്കുമെന്ന് തന്നെയാണ് ടീമിന്റെ വിശ്വാസമെന്ന് ക്യാപ്റ്റന്‍ വിരാട് കോഹ്‌ലിയും പരിശീലകന്‍ രവിശാസ്ത്രിയും അഭിപ്രായപ്പെട്ടു. സതാംപ്ടണില്‍ ഇന്ത്യ ബൗളിങ് നിരയേയാണ് കൂടുതലായും ആശ്രയിക്കുക എന്നതാണ് ഇന്ത്യന്‍ ക്യാംപില്‍ നിന്ന് ലഭിക്കുന്ന വിവരം. ജസ്പ്രീത് ബുംറ, ഹര്‍ദിക് പാണ്ഡ്യ, ഇഷാന്ത് ശര്‍മ, ഷമി എന്നീ പേസ് നിര ഇന്ത്യന്‍ ബൗളിങ്ങിന് കരുത്ത് പകരുമെന്ന വിശ്വാസത്തിലാണ് ഇന്ത്യന്‍ ടീം. മൂന്നാം ടെസ്റ്റില്‍ ഇന്ത്യന്‍ ബൗളിങ് നിര മികച്ച പ്രകടനം പുറത്തെടുത്തതിനെ തുടര്‍ന്നായിരുന്നു ജയിക്കാനായത്. മികച്ച ബൗളിങ് നിരയുള്ളതാണ് ഇപ്പോള്‍ ഇന്ത്യയുടെ ഏക ആശ്വാസമെന്ന് രവിശാസ്ത്രി പറഞ്ഞു.