തിരുവനന്തപുരം: ബാങ്കില്‍ ബാധ്യതയുണ്ടെന്ന് പറഞ്ഞ് റവന്യൂ അധികൃതര്‍ കൈവശാവകാശ സര്‍ട്ടിഫിക്കേറ്റ് നല്‍കാതിരിക്കുന്നത് തികഞ്ഞ മനുഷ്യാവകാശ ലംഘനമാണെന്ന് സംസ്ഥാന മനുഷ്യാവകാശ കമ്മിഷന്‍.
ബാങ്കില്‍ ബാധ്യതയുണ്ടെങ്കില്‍ അത് ഈടാക്കേണ്ട ചുമതല ബാങ്കിനാണെന്ന് കമ്മിഷന്‍ അധ്യക്ഷന്‍ ജസ്റ്റിസ് ആന്റണി ഡൊമിനിക് ഉത്തരവില്‍ പറഞ്ഞു. അതിന്റെ പേര് പറഞ്ഞ് സാധാരണക്കാരെ ബുദ്ധിമുട്ടിക്കരുത്. പൊഴിയൂര്‍ സ്വദേശിനി ഗേളി ലയന്‍സ് നല്‍കിയ പരാതിയിലാണ് നടപടി.
പരാതിക്കാരി തന്റെ വസ്തുവിന്റെ കൈവശാവകാശ സര്‍ട്ടിഫിക്കേറ്റ് ലഭിക്കാന്‍ കാരോട് വില്ലേജ് ഓഫിസില്‍ അപേക്ഷ നല്‍കിയെങ്കിലും സര്‍ട്ടിഫിക്കേറ്റ് നല്‍കിയില്ല.
തുടര്‍ന്ന് കമ്മിഷനില്‍ പരാതി നല്‍കി. കമ്മിഷന്‍ തഹസില്‍ദാരില്‍ നിന്നും റിപ്പോര്‍ട്ട് വാങ്ങി. പരാതിക്കാരി പ്രസ്തുത വസ്തുവിന്റെ ഈടില്‍ എസ്.ബി.ഐയില്‍ നിന്ന് വായ്പയെടുത്തിട്ടുണ്ടെന്നും ബാധ്യത തീര്‍ത്ത സര്‍ട്ടിഫിക്കേറ്റ് ഹാജരാക്കിയാല്‍ മാത്രമേ കൈവശാവകാശ സര്‍ട്ടിഫിക്കേറ്റ് നല്‍കാന്‍ കഴിയുകയുള്ളൂവെന്നും റിപ്പോര്‍ട്ടില്‍ പറയുന്നു.
അപേക്ഷയില്‍ നിയമപരമായ നടപടികള്‍ സ്വീകരിച്ച ശേഷം നെയ്യാറ്റിന്‍കര തഹസില്‍ദാര്‍ സെപ്റ്റംബര്‍ 15 നകം റിപ്പോര്‍ട്ട് നല്‍കണമെന്ന് കമ്മിഷന്‍ ആവശ്യപ്പെട്ടു.