ബംഗളൂരു: ബംഗളൂരു കേന്ദ്രീകരിച്ച് പ്രവര്‍ത്തിക്കുന്ന മയക്കുമരുന്ന് സംഘവുമായി ബന്ധമുണ്ടെന്ന ആരോപണത്തെ തുടര്‍ന്ന് കന്നഡ നടി രാഗിണി ദ്വിവേദിയെ സെന്‍ട്രല്‍ ക്രൈംബ്രാഞ്ച് അറസ്റ്റ് ചെയ്തു. രാഗിണിയുടെ വസതിയില്‍ ഇന്നലെ രാവിലെ റെയ്ഡ് നടക്കുകയും ഇതിനു പിന്നാലെ ചോദ്യം ചെയ്യാനായി ഇവരെ കസ്റ്റഡിയിലെടുക്കുകയും ചെയ്തിരുന്നു. തുടര്‍ന്നായിരുന്നു അറസ്റ്റ് രേഖപ്പെടുത്തിയത്. 

മലയാളത്തിലും ചില സിനിമകളില്‍ നായികയായിട്ടുള്ള രാഗിണിയുടെ നോര്‍ത്ത് ഈസ്റ്റ് ബംഗളൂരുവിലുള്ള വീട്ടില്‍ രാവിലെയായിരുന്നു റെയ്ഡ് നടന്നത്. കേസില്‍ ചോദ്യം ചെയ്യലിന് ഹാജരാകാന്‍ ഇവരോട് നേരത്തെ നിര്‍ദേശിച്ചിരുന്നെങ്കിലും ഇവര്‍ സമയം നീട്ടിച്ചോദിച്ചിരുന്നു. തിങ്കളാഴ്ച വരെ സമയം നീട്ടിനല്‍കണമെന്നായിരുന്നു അഭിഭാഷകര്‍ മുഖേന ഇവര്‍ ആവശ്യപ്പെട്ടത്. എന്നാല്‍, ഇതു നിരസിച്ച അന്വേഷണ സംഘം ഇവരെ കസ്റ്റഡിയിലെടുക്കുകയായിരുന്നു.

എന്നാല്‍, മയക്കുമരുന്ന് മാഫിയയുമായി തനിക്കു ബന്ധമില്ലെന്നാണ് രാഗിണി വ്യക്തമാക്കിയിരുന്നത്. കേസുമായി ബന്ധപ്പെട്ട് രാഗിണിയുടെ സുഹൃത്ത് രവി ശങ്കറിനെ നേരത്തെ അറസ്റ്റ് ചെയ്തിരുന്നു. കന്നഡ സിനിമാ മേഖലയുമായി ബന്ധപ്പെട്ട ഈ കേസില്‍ ചലചിത്ര രംഗത്തെ കൂടുതല്‍ പേരെ ചോദ്യം ചെയ്യുമെന്നാണ് വിവരം. ഈ മാഫിയയുമായി മലയാള സിനിമാ മേഖലയിലെ ചിലര്‍ക്കും ബന്ധമുണ്ടെന്ന ആരോപണമുയര്‍ന്നിട്ടുണ്ട്.