തൃക്കരിപ്പൂര്‍: പോരാളിയുടെ നാവിന്‍ തുമ്പിലൂടെ അടര്‍ന്നുവീണ 'പി.ഡി.സി കുഞ്ഞാമിന' ഫോറിന്‍ കുഞ്ഞാമിനയിലേക്കെത്തിയത് പരുപരുത്ത ജീവിത യാഥാര്‍ഥ്യങ്ങളില്‍ നിന്ന്. ഇന്നലെ തൃക്കരിപ്പൂര്‍ വടക്കെകൊവ്വലിലെ വീട്ടില്‍വച്ച് ഈ ലോകത്തോട് വിടപറഞ്ഞ ഫോറിന്‍ കുഞ്ഞാമിന എന്ന ഒ.ടി കുഞ്ഞാമിനക്ക് ജീവിതത്തിന്റെ പരുപരുത്ത ചരിത്രം ഏറെ പറയാനുണ്ടായിരുന്നു. കമ്മ്യൂണിസ്റ്റ് പ്രസ്ഥാനത്തിന്റെ ശുഭ്രതയായ മുന്‍ എം.എല്‍.എ പയ്യന്നൂരിലെ പരേതനായ എന്‍. സുബ്രഹ്മണ്യന്‍ ഷേണായിയുടെ സംഭാവനയാണ് പി.ഡി.സി കുഞ്ഞാമിനയെന്ന നാമം.
മക്കള്‍ക്കൊപ്പം പഠിച്ച കുഞ്ഞാമിന ഷേണായിക്ക് എന്നും വിസ്മയമായിരുന്നു. പെരിങ്ങോം, ഞെക്ലി, വയക്കര പ്രദേശമായ മലയോര മേഖലയില്‍ മുസ്‌ലിം പെണ്‍കുട്ടികള്‍ പഠനത്തില്‍ ഏറെ പിന്നാക്കം നിന്ന കാലത്താണ് കുഞ്ഞാമിന പയ്യന്നൂര്‍ ഗവ. കോളജില്‍ നിന്ന് പി.ഡി.സി പാസാകുന്നത്.
ജീവിതാവസാനം വരെ മതചിട്ട നിലനിര്‍ത്തിയ കുഞ്ഞാമിന സെക്കന്‍ഡറി വരെ മദ്‌റസ പഠനവും പൂര്‍ത്തിയാക്കിയിരുന്നു. ജീവിത പ്രയാസങ്ങള്‍ക്കുമുന്നില്‍ മുട്ടുമടക്കാതിരുന്ന കുഞ്ഞാമി പല കുടുംബങ്ങളിലും ആവശ്യമനുസരിച്ച് വിദേശ, സ്വദേശ നിര്‍മിത വസ്ത്രങ്ങള്‍ എത്തിച്ചുകൊടുത്താണ് തന്റെയും മക്കളുടെയും ജീവിതമാര്‍ഗം കണ്ടത്തിയിരുന്നത്.
വസ്ത്ര വില്‍പനയാണ് സുബ്രഹ്മണ്യ ഷേണായിയുടെ പി.ഡി.സി കുഞ്ഞാമിനയില്‍നിന്ന് ഫോറിന്‍ കുഞ്ഞാമിനയിലെത്തിയത്. നിരവധി പുരസ്‌കാരങ്ങള്‍ കുഞ്ഞാമിനയെ തേടിയെത്തിയിരുന്നു.