തിരുവനന്തപുരം: ഇന്ത്യയില്‍ ഏറ്റവും കൂടുതല്‍ തൊഴില്‍രഹിതര്‍ ആത്മഹത്യ ചെയ്യുന്ന സംസ്ഥാനം കേരളമാണെന്ന ദേശീയ ക്രൈംറെക്കോഡ്‌സ് ബ്യൂറോയുടെ റിപ്പോര്‍ട്ട് സംസ്ഥാന സര്‍ക്കാരിന്റെ കണ്ണുതുറപ്പിക്കണമെന്ന് മുന്‍ മുഖ്യമന്ത്രി ഉമ്മന്‍ ചാണ്ടി. 

2019ല്‍ കേരളത്തില്‍ തൊഴില്‍രഹിതരായ 1,963 പേരാണ്  ജീവനൊടുക്കിയത്. ഇന്ത്യയൊട്ടാകെ ആത്മഹത്യ ചെയ്ത തൊഴില്‍രഹിതര്‍ 14,019 ആണ്.  കേരളത്തില്‍ തൊഴില്‍രഹിതരുടെ ആത്മഹത്യാനിരക്ക് 14 ശതമാനമാണ്. മഹാരാഷ്ട്രയില്‍ 10.8 ശതമാനവും  തമിഴ്‌നാട്ടില്‍ 9.8 ശതമാനവും കര്‍ണാടകയില്‍ 9.2 ശതമാനവുമാണ്. പി.എസ്.സി നിയമനം ലഭിക്കാതെ മനംനൊന്ത് കാരക്കോണം പുത്തന്‍വീട്ടില്‍ എസ്. അനു ആത്മഹത്യ ചെയ്തപ്പോള്‍ അത് ഒറ്റപ്പെട്ട സംഭവമാണെന്ന് പറഞ്ഞ് സര്‍ക്കാരും പി.എസ്.സിയും ഉത്തരവാദിത്വത്തില്‍നിന്ന് ഒഴിഞ്ഞുമാറി. 

അനുവിന്റെ ആത്മഹത്യ ഒറ്റപ്പെട്ട സംഭവമല്ലെന്ന യാഥാര്‍ഥ്യമാണ്  റിപ്പോര്‍ട്ടിലൂടെ പുറത്തുവരുന്നത്.  അനുവിനെപ്പോലെ 1,963 പേരെ  ആത്മഹത്യയിലേക്ക് നയിച്ചതിനുപിന്നില്‍ സര്‍ക്കാരിന്റെ വീഴ്ചകളുണ്ട്. പുതിയ തൊഴിലവസരം ഉണ്ടാക്കുന്നതിലും നിലനിര്‍ത്തുന്നതിലും സര്‍ക്കാര്‍ ദയനീയമായി  പരാജയപ്പെട്ടതായും ഉമ്മന്‍ചാണ്ടി പറഞ്ഞു.