ഏറ്റുമാനൂര്‍: സ്‌കൂട്ടറും സ്വകാര്യ ബസും കൂട്ടിയിടിച്ച് ഒരു കുടുംബത്തിലെ നാല് പേര്‍ക്ക് പരിക്ക്. ശനിയാഴ്ച രാവിലെ 11.30ന് നീണ്ടൂര്‍ റോഡില്‍ കൈപ്പുഴ കുരിശു പള്ളിക്ക് സമീപമുണ്ടായ അപകടത്തില്‍ കടുത്തുരുത്തി കൊല്ലം പറമ്പില്‍ ഷിജി (44) , ഭാര്യ ബിന്ദു (41) , മക്കളായ ജെറാള്‍ഡ് (12) , ജോസഫ് (7) എന്നിവര്‍ക്കാണ് പരുക്കേറ്റത്. ഇവരെ കോട്ടയം മെഡിക്കല്‍ കോളജ് ആശുപത്രിയില്‍ പ്രവേശിപ്പിച്ചു. വൈക്കം റൂട്ടില്‍ സര്‍വിസ് നടത്തുന്ന വന്ദന ബസും സ്‌കൂട്ടറുമാണ് അപകടത്തില്‍പ്പെട്ടത്. നീണ്ടൂര്‍ ഭാഗത്ത് നിന്നും വരികയായിരുന്ന സ്‌കൂട്ടര്‍ നിയന്ത്രണംവിട്ട് അതിരമ്പുഴ റോഡില്‍ നിന്നും നീണ്ടൂര്‍ റോഡിലേക്ക് കയറുകയായിരുന്ന സ്വകാര്യ ബസിന്റെ അടിയിലേയ്ക്ക് ഇടിച്ച് കയറുകയായിരുന്നു. ഓടിക്കൂടിയ നാട്ടുകാര്‍ ചേര്‍ന്നാണ് ഇവരെ ആശുപത്രിയില്‍ എത്തിച്ചത്. ഷിജിയ്ക്ക് തലയ്ക്കും നെഞ്ചിലും പരുക്കേറ്റിട്ടുണ്ട്. ബിന്ദുവിനും തലയ്ക്കാണ് പരുക്ക്. അപകടത്തെ തുടര്‍ന്ന് കൈപ്പുഴ റോഡില്‍ ഗതാഗതം തടസപ്പെട്ടു.