തുറവൂര്‍: ഓടിക്കൊണ്ടിരിക്കേ തീപിടിച്ചു മിനി ബസ് പൂര്‍ണ്ണമായും കത്തിനശിച്ചു. ചെല്ലാനം അന്ധകാരനഴി തീരദേശ റോഡില്‍ പ്രതിഭാ ബസ്‌റ്റോപ്പിനു സമീപം ഇന്നലെ പുലര്‍ച്ചെ നാലോടെയായിരുന്നു അപകടം.
അഴീക്കല്‍, പാട്ടം ഭാഗങ്ങളില്‍ നിന്ന് മത്സ്യത്തൊഴിലാളികളെ കയറ്റി കൊച്ചി ഹാര്‍ബറിലേക്ക് കൊണ്ടു പോകാന്‍ വന്ന ബസ്സാണ് കത്തിയത്. എന്‍ജിന്റെ ഭാഗത്തു നിന്ന് പുക ഉയരുന്നത് കണ്ടു ഡ്രൈവര്‍ പള്ളിത്തോട്ട് സ്വദേശി  കുട്ടപശ്ശേരി വീട്ടില്‍ ബിനീഷ് (25) ബസ് നിര്‍ത്തി ചാടി ഇറങ്ങിയതിനാല്‍ പരിക്കേല്‍ക്കാതെ രക്ഷപെടുകയായിരുന്നു. നാട്ടുകാര്‍ അറിയിച്ചതിനെ തുടര്‍ന് ചേര്‍ത്തലയില്‍ നിന്നെത്തിയ അഗ്നിശമന സേനയും കുത്തിയതോടു പൊലിസും നാട്ടുകാരും ചേര്‍ന്ന് ഒരു മണിക്കുര്‍ പരിശ്രമിച്ചാണ് തീയണച്ചത്. അപകടത്തെ തുടര്‍ന്ന് പ്രദേശത്തെ വൈദ്യതിബന്ധം വിഛേദിച്ചു. ചെല്ലാനം സ്വദേശി വാച്ചക്കല്‍ ചാള്‍സിന്റെ ഉടമസ്ഥതയില്‍ ഉള്ളതാണ് കത്തിയ ബസ്. കുത്തിയതോട് പൊലിസ് കേസെടുത്തു.