കൊച്ചി: തെരഞ്ഞെടുപ്പിനുശേഷം സംസ്ഥാനത്തെ സ്ഥാനാര്‍ഥികളെല്ലാം വിശ്രമത്തിലാണെങ്കിലും എറണാകുളം മണ്ഡലത്തില്‍ ആവേശത്തോടെ വീണ്ടും വോട്ട് തേടുകയാണ് സ്ഥാനാര്‍ഥികള്‍.
റീപോളിങ് നടക്കുന്ന കളമശ്ശേരി മണ്ഡലത്തിലെ 83ാം നമ്പര്‍ ബൂത്തിലാണ് സ്ഥാനാര്‍ഥികളായ പി.രാജീവും ഹൈബി ഈഡനും അല്‍ഫോണ്‍സ് കണ്ണന്താനവും വീണ്ടും വീടുകള്‍ കയറിയിറങ്ങി വോട്ടഭ്യര്‍ഥിക്കുന്നത്.
ചൊവ്വാഴ്ചയാണ് റീപോളിങ്. 187 വീടുകളിലായി 912 വോട്ടര്‍മാരാണ് ഇവിടെയുള്ളത്. രാവിലെ ഏഴ് മുതല്‍ വൈകിട്ട് ആറുവരെയാണ് പോളിങ്.സംസ്ഥാനത്ത് റീപോളിങ് നടക്കുന്ന ഒരേയൊരു ബൂത്താണിത്. പോള്‍ ചെയ്തതിനേക്കാള്‍ 43 വോട്ടുകള്‍ അധികമായി കണ്ടെത്തിയതിനെ തുടര്‍ന്നാണ് റീപോളിങ് നടത്താന്‍ തെരഞ്ഞെടുപ്പ് കമ്മിഷന്‍ തീരുമാനിച്ചത്. ഇതിനേതുടര്‍ന്ന് ജില്ലാ കലക്ടര്‍ ഇടപെട്ട് വോട്ടിങ് മെഷിന്‍ പ്രത്യേകം സൂക്ഷിക്കാന്‍ നിര്‍ദേശിക്കുകയായിരുന്നു. പിന്നീടാണ് തെരഞ്ഞെടുപ്പ് കമ്മിഷന്‍ റീപോളിങ്ങിന് തീരുമാനമെടുത്തത്.
മോക്ക് പോളിങ് നടത്തിയപ്പോള്‍ രേഖപ്പെടുത്തിയ വോട്ടുകള്‍ പോളിങ് തുടങ്ങുന്നതിനു മുന്‍പ് വോട്ടിങ് മെഷിനില്‍ നിന്ന് നീക്കംചെയ്യാന്‍ ഉദ്യോഗസ്ഥര്‍ വിട്ടുപോയതാണ് അധിക വോട്ടുകള്‍ വരാന്‍ കാരണം.