കൊടുങ്ങല്ലൂര്‍: ബൈക്കില്‍ കറങ്ങി കഞ്ചാവ് വില്‍പ്പന നടത്തുന്ന യുവാവ് എക്‌സൈസിന്റെ പിടിയിലായി. വിദ്യാഭ്യാസ സ്ഥാപനങ്ങളുടെ പരിസരം കേന്ദ്രീകരിച്ച് കഞ്ചാവ് വില്‍പ്പന നടത്തി വന്ന ഇരിങ്ങാലക്കുട കാരുമാത്ര അക്കോടന്‍പുള്ളി വീട്ടില്‍ ശരത്കുമാറി(24)നെയാണ് എക്‌സൈസ് സര്‍ക്കിള്‍ ഇന്‍സ്‌പെക്ടര്‍ ടി.കെ അഷ്‌റഫും സംഘവും അറസ്റ്റ് ചെയ്തത്.
 ഇയാളുടെ പക്കല്‍ നിന്നും പൊതികളായി സൂക്ഷിച്ചിരുന്ന കഞ്ചാവ് പിടികൂടി. കഞ്ചാവ് വില്‍പ്പന സംഘത്തിന്റെ കൊടുങ്ങല്ലൂരിലെ പ്രധാന കണ്ണിയാണ് ഇയാളെന്ന് എക്‌സൈസ് അധികൃതര്‍ പറഞ്ഞു.
 അഞ്ച് ഗ്രാം കഞ്ചാവ് 500 രൂപക്കും, 10 ഗ്രാം കഞ്ചാവ് ആയിരം രൂപക്കുമാണ് വില്‍പ്പന നടത്തിയിരുന്നത്. ആളൊഴിഞ്ഞ പുരയിടങ്ങളിലും മറ്റും ഒളിപ്പിച്ച് വെക്കുന്ന കഞ്ചാവ് ആവശ്യക്കാരെ കണ്ടെത്തി നിമിഷ നേരം കൊണ്ട് എത്തിച്ചു നല്‍കുന്നതായിരുന്നു ഇയാളുടെ രീതി. പിടിയിലാകാതിരിക്കാനായി വേഗത കൂടിയ ന്യൂജനറേഷന്‍ ബൈക്കാണ് ഇയാള്‍ ഉപയോഗിച്ചിരുന്നത്. ഇയാളുടെ യമഹ മോട്ടോര്‍ ബൈക്കും എക്‌സൈസ് കസ്റ്റഡിയിലെടുത്തിട്ടുണ്ട്.
കൊടുങ്ങല്ലൂര്‍ കാവില്‍ക്കടവില്‍ സംശയകരമായ സാഹചര്യത്തില്‍ കണ്ടെത്തിയ ശരത്കുമാര്‍ എക്‌സൈസ് സംഘത്തെ കണ്ട് രക്ഷപ്പെടാന്‍ ശ്രമിക്കുന്നതിനിടയില്‍ പിന്തുടര്‍ന്ന് പിടികൂടുകയായിരുന്നു. എട്ടാം ക്ലാസ് മുതലുള്ള വിദ്യാര്‍ഥികള്‍ ഇയാളുടെ ഇടപാടുകാരാണെന്ന് എക്‌സൈസ് അധികൃതര്‍ പറഞ്ഞു.
ആവശ്യക്കാര്‍ക്കിടയില്‍ ശങ്കു എന്ന പേരിലാണ് ഇയാള്‍ അറിയപ്പെടുന്നത്. പ്രിവന്റീവ് ഓഫീസര്‍ കെ.എ ജയദേവന്‍, സിവില്‍ എക്‌സൈസ് ഓഫീസര്‍മാരായ ടി.ആര്‍ സുനില്‍, ടി.കെ അബ്ദുള്‍ നിയാസ്, പി.ആര്‍ സുനില്‍കുമാര്‍, സി.എ സാബു, കെ.കെ ഉണ്ണികൃഷ്ണന്‍, ടി.പി രാധാകൃഷ്ണന്‍ എന്നിവരും അന്വേഷണ സംഘത്തില്‍ ഉണ്ടായിരുന്നു.