ലോസ് ഏഞ്ചല്‍സ്: അമേരിക്കയില്‍ കാലിഫോര്‍ണിയയിലെ ജൂതദേവാലയത്തിനു നേരെ കൗമാരക്കാരന്‍ വെടിവയ്പു നടത്തി. ഒരാള്‍ മരിക്കുകയും പുരോഹിതനുള്‍പ്പെടെ മൂന്നുപേര്‍ക്ക് പരുക്കേല്‍ക്കുകയും ചെയ്തു. 60 വയസ്സുള്ള സ്ത്രീയാണ് കൊല്ലപ്പെട്ടത്. 19കാരനായ ജോണ്‍ ഏണസ്റ്റാണ് വെടിവയ്പു നടത്തിയത്. 

പിറ്റിസ്ബര്‍ഗിലെ ജീവവൃക്ഷ ദേവാലയത്തില്‍ വെള്ളക്കാരനായ അക്രമി നടത്തിയ വെടിവയ്പില്‍ 11 ജൂതന്മാര്‍ കൊല്ലപ്പെട്ട സംഭവം നടന്ന് ആറുമാസത്തിനു ശേഷമാണ് ഈ വെടിവയ്പ് നടന്നിരിക്കുന്നത്. പുരോഹിതന്റെ രണ്ടു ചൂണ്ടുവിരലിനും പരിക്കുണ്ട്. ഒരു പെണ്‍കുട്ടിയും 34കാരനുമാണ് വെടിയുണ്ടയേറ്റ് പരുക്കേറ്റ മറ്റു രണ്ടുപേര്‍.

ഉച്ചയ്ക്ക് 11 മണിയോടെ ദേവാലയത്തിലെത്തിയ അക്രമി പ്രാര്‍ഥനക്കെത്തിയവരുടെ നേരെ വിവേചനമില്ലാതെ വെടിവയ്ക്കുകയായിരുന്നു. തോക്ക് ശരിയായി പ്രവര്‍ത്തിക്കാതിരുന്നതിനാലാണ് ബാക്കിയുള്ളവര്‍ രക്ഷപ്പെട്ടത്.
ഈസമയം പള്ളിയിലെത്തിയ സാന്‍ഡിഗോ പൊലിസ് ഓഫിസര്‍ അക്രമിയെ പിടികൂടി. പിടിയിലായ 19കാരന്‍ സമൂഹമാധ്യമങ്ങളില്‍ വംശീയവിദ്വേഷം നിറഞ്ഞ ആശയങ്ങള്‍ പോസ്റ്റ് ചെയ്തതായി പൊലിസ് പറഞ്ഞു.