റിയാദ്: സഊദിയിൽ നിന്നും അനധികൃതമായി വിദേശത്തേക്ക് പണമയച്ച വിദേശികൾ പിടിയിൽ. സഊദി പൗരന്മാരുടെ ബാങ്ക് അകൗണ്ടുകളിൽ നിന്നും വൻതോതിൽ വിദേശത്തേക്ക് പണമയക്കാൻ ശ്രമിച്ച കേസിലാണ് വിദേശ പൗരന്മാർ റിയാദ് പോലീസിന്റെ പിടിയിലായതെന്ന് സഊദി വാർത്താ ഏജൻസി റിപ്പോർട്ട് ചെയ്‌തു. സഊദി പൗരന്മാരുടെ പേരിൽ രജിസ്റ്റർ ചെയ്തിട്ടുള്ള വ്യക്തിഗത ബിസിനസ് ബാങ്ക് അക്കൗണ്ടുകൾ ഉപയോഗിച്ചാണ് കമ്മീഷൻ വ്യവസ്ഥയിൽ പണം അയക്കാൻ ശ്രമം നടന്നത്.

     മൂന്ന് വീതം സിറിയൻ, ഈജിപ്ഷ്യൻ പൗരന്മാർ, യമൻ, പാകിസ്ഥാൻ, തുർക്കി പൗരന്മാരയായ ഓരോരുത്തരുമാണ് പിടിയിലായത്. പിടിയിലായവർ മുപ്പതിനും അമ്പതിനും പ്രായമുള്ളവരാണ്. ഇവരിൽ നിന്നും ഒരു മില്യൺ റിയാൽ (266,640 ഡോളർ) പിടിച്ചെടുക്കുകയും ചെയ്‌തിട്ടുണ്ട്‌. ഒമ്പതംഗ സംഘം കുറ്റം സമ്മതിച്ചതായും കേസ് പബ്ലിക് പ്രോസിക്യൂഷന് കൈമാറിയതായും റിപ്പോർട്ടിൽ വ്യക്തമാക്കി. അഞ്ഞൂറ് മില്യൺ റിയാൽ (133 മില്ല്യൺ ഡോളർ) വിദേശത്തേക്ക് അയച്ച കേസിൽ ഒരു സംഘത്തെ ഇക്കഴിഞ്ഞ ഓഗസ്‌റ്റിൽ സഊദി പോലീസ് അറസ്‌റ്റ് ചെയ്‌തിരുന്നു.