ലണ്ടന്‍: പ്രീമിയര്‍ ലീഗിലെ ഒന്നാം സ്ഥാനം വിട്ടുകൊടുക്കാതെ മാഞ്ചസ്റ്റര്‍ സിറ്റി. ഇന്നലെ നടന്ന മത്സരത്തില്‍ ബേണ്‍ലി എഫ്.സിയെ എതിരില്ലാത്ത ഒരു ഗോളിന് പരാജയപ്പെടുത്തിയാണ് സിറ്റി വീണ്ടും ഒന്നാം സ്ഥാനത്തേക്ക് തിരിച്ചെത്തിയത്. 63ാം മിനുട്ടില്‍ സെര്‍ജിയോ അഗ്യൂറോയാണ് സിറ്റിയുടെ വിജയഗോള്‍ നേടിയത്. ഇതോടെ 36 മത്സരത്തില്‍ സിറ്റിക്ക് 92 പോയിന്റായി.
രണ്ടാം സ്ഥാനത്തുള്ള ലിവര്‍പൂളിന് 91 പോയിന്റുമുണ്ട്. അതേസമയം, ആദ്യ നാലില്‍ ഉള്‍പ്പെടാനുള്ള മത്സരത്തില്‍ അടിമുടി മാറ്റം വന്നു. ഇന്നലെ നടന്ന മത്സരത്തില്‍ ലെസ്റ്റര്‍സിറ്റിയോട് എതിരില്ലാത്ത മൂന്ന് ഗോളുകള്‍ക്കായിരുന്നു ആഴ്‌സനലിന്റെ തോല്‍വി. ഇതോടെ ആദ്യ നാലിലെത്താനുള്ള ആഴ്‌സനലിന്റെ പ്രതീക്ഷകള്‍ തുലാസിലായി.