ഉരുവച്ചാല്‍: ശിവപുരത്ത് കടയിലെത്തിയ കുരങ്ങ് പഴവര്‍ഗങ്ങള്‍ ഭക്ഷിക്കുന്നത് കണ്ടുനാട്ടുകാര്‍ക്ക് കൗതുകമായി.
ശിവപുരം ടൗണിലെ മുത്തുവിന്റെ വിശ്വാസ് ഫ്‌റൂട്‌സ് കടയിലാണ് ഇന്നലെ രാവിലെ കുരങ്ങ് കയറിയത്.
ശിവപുരത്തും സമീപ പ്രദേശങ്ങളിലും കുരങ്ങുകളുടെ ശല്യമുണ്ടെങ്കിലും ആദ്യമായാണ് കടയിലെത്തുന്നത്. മുന്തിരി, ആപ്പിള്‍, അനാര്‍, നാരങ്ങ തുടങ്ങിയവ എടുത്ത് ഭക്ഷിച്ചു.
വെമ്പടിതട്ട്, പടുപാറ, ശിവപുരം ചാപ്, നടുവനാട് എന്നിവിടങ്ങളില്‍ കുരങ്ങുകളുടെ ശല്യം രൂക്ഷമായിട്ടുണ്ട്. ശിവപുരം ടൗണിലെ മരത്തില്‍ പക്ഷികള്‍ കെട്ടിയ കൂടും തകര്‍ത്തു. പടുപാറയിലെ അഷ്‌റഫിന്റെ വീട്ടുപറമ്പിലെ തെങ്ങിലെ മുഴുവന്‍ തേങ്ങയും നശിപ്പിച്ചിരിക്കുകയാണ്. വീട്ടാവശ്യത്തിനുള്ള തേങ്ങ പോലും ലഭിക്കുന്നില്ലന്ന് വീട്ടുകാര്‍ പറയുന്നു. കൂട്ടത്തോടെ എത്തുന്ന കുരങ്ങുകളെ ഓടിക്കാന്‍ ശ്രമിക്കുമ്പോള്‍ തിരിച്ചു അക്രമിക്കുന്നതായും നാട്ടുകാര്‍ പറയുന്നു. ശിവപുരം നടുവനാട് മേഖലയില്‍ വാഴക്കുലകള്‍, പച്ചക്കറി ഉല്‍പ്പന്നങ്ങള്‍ നശിപ്പിക്കുന്നതിനാല്‍ കര്‍ഷകരെ ദുരിതത്തിലാക്കിയിരിക്കയാണ്. കര്‍ഷകര്‍ക്ക് കൃഷി ചെയ്യാന്‍ സാധിക്കാത്ത അവസ്ഥയാണുള്ളത്.