കൊച്ചി: ശ്രീലങ്കന്‍ സ്‌ഫോടനത്തിന്റെ സൂത്രധാരന്‍ സഫ്രാന്‍ ഹാഷിമുമായി ബന്ധമുണ്ടെന്ന് സംശയിച്ച് എന്‍.ഐ.എ ചോദ്യം ചെയ്ത മൂന്നു പേരില്‍ പാലക്കാട് സ്വദേശി റിയാസ് അബൂബക്കറിന്റെ അറസ്റ്റ് എന്‍.ഐ.എ രേഖപ്പെടുത്തി. കേരളത്തില്‍ ചാവേര്‍ ആക്രമണത്തിന് ഇയാള്‍ പദ്ധതിയിട്ടിരുന്നതായി എന്‍.ഐ.എ വൃത്തങ്ങള്‍ പറഞ്ഞു. ശ്രീലങ്കയിലെ സ്‌ഫോടനത്തിന്റെ മുഖ്യസൂത്രധാരന്‍ സഫ്രാന്‍ ഹാഷിമിന്റെ ആരാധകനായിരുന്നു ഇയാളെന്നും എന്‍.ഐ.എ വൃത്തങ്ങള്‍ പറയുന്നു. റിയാസ് അബൂബക്കറിനെ ഇന്ന് കൊച്ചി എന്‍.ഐ കോടതിയില്‍ ഹാജരാക്കും.
റിയാസ് അബൂബക്കറിന്റെയും കാസര്‍കോട് കളിയങ്കാട് അഹമ്മദ് അറഫാത്ത്, അബൂബക്കര്‍ സിദ്ദീഖ് എന്നിവരുടെയും വീടുകളില്‍ എന്‍.ഐ.എ റെയ്ഡുകള്‍ നടത്തിയിരുന്നു. എന്നാല്‍ റെയ്ഡുകള്‍ക്ക് ശ്രീലങ്കയിലെ ക്രിസ്ത്യന്‍ പള്ളികള്‍ക്കു നേരെയുണ്ടായ ആക്രമണവുമായി ബന്ധമില്ലെന്ന് എന്‍.ഐ.എ ഇന്നലെ പ്രതികരിച്ചിരുന്നു. റെയ്ഡിനു പിന്നാലെയാണ് റിയാസ് അബൂബക്കറിനെ കൂടുതല്‍ ചോദ്യംചെയ്യാനായി എന്‍.ഐഎ. കസ്റ്റഡിയിലെടുത്തത്.