ഇന്നലെ 163 ബസുകള്‍ക്കെതിരേ കേസടുത്തു

തിരുവനന്തപുരം: അന്തര്‍ സംസ്ഥാന ബസുകളുടെ നിയമലംഘനത്തില്‍ മോട്ടോര്‍ വാഹന വകുപ്പിന്റെ നടപടികള്‍ തുടരുന്നു. ഇന്നലെ 163 ബസുകള്‍ക്കെതിരേ കേസടുത്തു. ഇതില്‍ സ്റ്റേറ്റ് ക്യാരേജുകളായി സര്‍വിസ് നടത്തിയ 158 ബസുകളില്‍നിന്നും പിഴ ഈടാക്കി. 48,500 രൂപയാണ് ഇത്തരത്തില്‍ പിഴയായി മോട്ടോര്‍ വാഹന വകുപ്പ് ഈടാക്കിയത്.

നിയമലംഘനം നടത്തുന്ന അന്തര്‍ സംസ്ഥാന ബസ് സര്‍വിസുകള്‍ക്കെതിരേ മോട്ടോര്‍ വാഹന വകുപ്പ് ആരംഭിച്ച നടപടി അഞ്ച് ദിവസം പിന്നിട്ടു. ഇതിനിടെ പരിശോധനകളിലൂടെ 1037 ബസുകള്‍ക്കെതിരേയാണ് നടപടി സ്വീകരിച്ചത്. സംസ്ഥാനത്തെ 19 ചെക്ക് പോസ്റ്റുകളിലാണ് മോട്ടോര്‍ വാഹന വകുപ്പ് ബസുകളുടെ പരിശോധന ശക്തമാക്കിയിരിക്കുന്നത്.

അതിനിടെ ഇത്തരം ബസുകള്‍ക്കെതിരായ നടപടി ശക്തമാക്കിയ സാഹചര്യത്തില്‍ ഒരു വിഭാഗം ബസുകള്‍ സര്‍വിസ് നിര്‍ത്തിവച്ചു. ലക്ഷ്വറി ബസ് ഓപ്പറേറ്റേഴ്‌സിന്റെ സംഘടനയാണ് സര്‍വിസ് നിര്‍ത്തിവച്ച് പ്രതിഷേധിച്ചത്.