മുക്കം: ഉരുള്‍പൊട്ടലിന്റെ പശ്ചാത്തലത്തില്‍ കഴിഞ്ഞ ദിവസം പരിശോധനയ്ക്ക് കാരശ്ശേരി പഞ്ചായത്തിലെത്തിയ ജില്ലാ ജിയോളജിസ്റ്റിനെ നാട്ടുകാര്‍ തടഞ്ഞതുമായി ബന്ധപ്പെട്ട വിഷയത്തില്‍ പരിസ്ഥിതി പ്രവര്‍ത്തകര്‍ അടക്കം ഏഴു പേര്‍ക്കെതിരേ ജാമ്യമില്ലാവകുപ്പ് പ്രകാരം കേസ്.
തോട്ടുമുക്കം മൈസൂര്‍ പറ്റ സ്വദേശിയും പരിസ്ഥിതി പ്രവര്‍ത്തകനുമായ ബാലകൃഷ്ണന്‍, കാരശ്ശേരി തോട്ടക്കാട് സ്വദേശി ജോണ്‍സണ്‍, കണ്ടാലറിയാവുന്ന അഞ്ചു പേര്‍ എന്നിവര്‍ക്കെതിരെയാണ് ജിയോളജിസ്റ്റിന്റെ പരാതിയില്‍ പൊലിസ് കേസെടുത്തത്. ഇതില്‍ ജോണ്‍സണ്‍ സംഭവസ്ഥലത്ത് ഇല്ലാത്ത വ്യക്തിയും ബാലകൃഷ്ണന്‍ പ്രശ്‌നം തീര്‍ന്നശേഷം അവിടെ എത്തിപ്പെട്ടയാളുമാണ്.
വിവരാവകാശ നിയമപ്രകാരം നിരവധി രേഖകള്‍ ജിയോളജി വകുപ്പില്‍ നിന്ന് ശേഖരിക്കുന്ന വ്യക്തികളായതിനാലാണ് തങ്ങള്‍ക്കെതിരേ കേസ് നല്‍കിയതെന്ന് ബാലകൃഷ്ണന്‍ പറഞ്ഞു. തങ്ങള്‍ക്കെതിരേ പരാതി നല്‍കിയ ജിയോളജിസ്റ്റിനെതിരേ നിലവില്‍ വിജിലന്‍സ് കേസ് ഉണ്ടന്നും ബാലകൃഷ്ണന്‍ പറഞ്ഞു. ക്വാറി മാഫിയയുടെ സ്വാധീനത്തിന് വഴങ്ങിയാണ് കേസ് നല്‍കിയതെന്നും അദ്ദേഹം ആരോപിച്ചു.