മാഡ്രിഡ്: ബാഴ്‌സലോണ ലാലിഗയുടെ കിരീട നേട്ടം ആഘോഷിക്കുമ്പോള്‍ റയല്‍മാഡ്രിഡ് തോല്‍വികളില്‍ നിന്ന് തോല്‍വികളിലേക്ക് കൂപ്പുകുത്തിക്കൊണ്ടിരിക്കുന്നു. കഴിഞ്ഞ ദിവസം നടന്ന ലാലിഗ മത്സരത്തില്‍ സീസണിലെ അവസാന സ്ഥാനക്കാരായ റയോ വല്ലേക്കാനേയോടാണ് റയല്‍ മാഡ്രിഡ് ഒരു ഗോളിന് പരാജയപ്പെട്ടത്. 23-ാം മിനുട്ടില്‍ പെനാല്‍റ്റിയില്‍ നിന്ന് എംബാര്‍ബയാണ് വല്ലേക്കാനേയുടെ വിജയ ഗോള്‍ നേടിയത്. സമനില ഗോളെങ്കിലും നേടി രക്ഷപ്പെടാന്‍ റയല്‍ മാഡ്രിഡ് കിണഞ്ഞ് ശ്രമിച്ചെങ്കിലും റയലിന്റെ ശ്രമങ്ങള്‍ വിജയം കണ്ടില്ല. തോല്‍വിയോടെ റയലിന് ഇത്തവണ ലീഗില്‍ മൂന്നാം സ്ഥാനം കൊണ്ട് തൃപ്തിപ്പെടേണ്ടിവന്നു. 35 മത്സരങ്ങളില്‍നിന്ന് റയലിന് 65 പോയിന്റാണുള്ളത്. ഇത്രയും മത്സരങ്ങളില്‍ നിന്ന് 83 പോയിന്റുമായിട്ടാണ് ബാഴ്‌സലോണ ലീഗ് ചാംപ്യന്‍മാരായത്.

74 പോയിന്റുള്ള അത്‌ലറ്റിക്കോ മാഡ്രിഡ് ആണ് ര@ണ്ടാം സ്ഥാനത്ത്. സീസണില്‍ മോശം പ്രകടനം നടത്തുന്ന റയലിനെ രക്ഷിക്കാന്‍ സിദാന്‍ രണ്ടാം തവണയും പരിശീലക സ്ഥാനത്തെത്തിയിരുന്നു. എന്നാല്‍ സിദാന്റെ രണ്ടാം വരവിലും റയലിന് കാര്യമായ മുന്നേറ്റങ്ങളൊന്നും ഉണ്ടാക്കാന്‍ സാധിച്ചില്ല. കഴിഞ്ഞ ദിവസം കരീം ബെന്‍സേമ ഇല്ലാത്തതും റയലിന് തിരിച്ചടിയായി. സീസണില്‍ റയല്‍ മാഡ്രിഡ് പൂര്‍ണ പരാജയമായിരുന്നെങ്കിലും കരീം ബെന്‍സേമ മികച്ച ഫോമിലായിരുന്നു.

ക്രിസ്റ്റ്യാനോ യുവന്റസിലേക്ക് ചേക്കേറിയപ്പോള്‍ റയലിന്റെ ഫിനിഷറുടെ റോള്‍ ബെന്‍സേമക്കായിരുന്നു.
കഴിഞ്ഞ ആഴ്ച ഹാംസ്രിങ് ഇഞ്ചുറിയെ തുടര്‍ന്ന് ടീമില്‍ നിന്ന് വിട്ട് നിന്ന ബെന്‍സേമ ഈ സീസണില്‍ ഇനി കളത്തിലിറങ്ങിയേക്കില്ല. അതേസമയം പുതിയ സീസണില്‍ മികച്ച താരങ്ങളെ ടീമിലെത്തിച്ച് പ്രതാപത്തിലേക്ക് മടങ്ങാനുള്ള ഒരുക്കത്തിലാണ് റയല്‍. 1997ന് വല്ലേക്കാനോയുടെ റയലിനെതിരേയുള്ള ആദ്യജയം കൂടിയായിരുന്നു ഇന്നലത്തേത്.