കാഠ്മണ്ഡു: എവറസ്റ്റ് പര്‍വതനിരയുടെ വിവിധ ഭാഗങ്ങളില്‍നിന്ന് 3,000 കിലോ പ്ലാസ്റ്റിക് മാലിന്യങ്ങള്‍ ഉള്‍പ്പെടെയുള്ളവ ശേഖരിച്ചു. ഏപ്രില്‍ 14ന് തുടങ്ങിയ സാഗര്‍മാതാ ശുചീകരണ പദ്ധതിയുടെ ഭാഗമായിട്ടാണ് മേഖലയില്‍ ശുചീകരണം നടത്തിയത്. ശേഖരിച്ച മാലിന്യങ്ങള്‍ ഹെലികോപ്റ്റര്‍ വഴി മേഖലയില്‍നിന്ന് നീക്കം ചെയ്തതായി നേപ്പാള്‍ ടൂറിസം ഡിപ്പാര്‍ട്ട്‌മെന്റ് ഡയരക്ടര്‍ ജനറല്‍ ദന്തുരാജ് ഖിമിര്‍ പറഞ്ഞു.
മാലിന്യ ശേഖരത്തിന് പ്രത്യേക മുന്‍കരുതലെടുത്താണ് സന്നദ്ധ പ്രവര്‍ത്തകര്‍ മേഖലയില്‍ എത്തിയിരുന്നത്. ശുചീകരണത്തിനായി 23 മില്യന്‍ നേപ്പാളി രൂപ ചെലവഴിച്ചതായും ടൂറിസം ഡയരക്ടര്‍ അറിയിച്ചു. ശുചീകരണത്തിനിടയില്‍ നാലുപേരുടെ മൃതദേഹങ്ങളും ഇവിടെനിന്ന് കണ്ടെത്തിയിട്ടുണ്ട്.