തിരുവനന്തപുരം: നിയമസഭാ ചരിത്രത്തില്‍ ഏറെ നാണക്കേടുണ്ടാക്കിയ, 2015 മാര്‍ച്ച് 13ന് ധനമന്ത്രിയായിരുന്ന കെ.എം മാണിയുടെ ബജറ്റ് അവതരണത്തോടനുബന്ധിച്ച് നിയമസഭയിലുണ്ടായ കൈയാങ്കളിക്കേസ് പരിഗണിക്കുന്നത് തിരുവനന്തപുരം സി.ജെ.എം കോടതി ഈ മാസം 17ലേക്ക് മാറ്റി.
കേസ് പിന്‍വലിക്കാനുള്ള സര്‍ക്കാര്‍ തീരുമാനത്തില്‍ വിശദീകരണം കേള്‍ക്കാനാണ് കേസ് മാറ്റിയത്. ഇന്നലെ കോടതിയില്‍ കേസ് പരിഗണിക്കുന്നതിനിടെ സര്‍ക്കാര്‍ അഭിഭാഷകയും പ്രതികളുടെ അഭിഭാഷകനും തമ്മില്‍ തര്‍ക്കമുണ്ടായി. കേസ് പിന്‍വലിക്കുന്നതിനെക്കുറിച്ച് പ്രതികളുടെ അഭിഭാഷകര്‍ വാദമുന്നയിക്കാന്‍ ശ്രമിച്ചപ്പോഴാണ് സര്‍ക്കാര്‍ അഭിഭാഷക എതിര്‍പ്പുന്നയിച്ചത്. കേസ് പിന്‍വലിക്കാനുള്ള സര്‍ക്കാര്‍ തീരുമാനത്തെക്കുറിച്ച് കോടതിയെ അറിയിക്കാനുള്ള ഉത്തരവാദിത്വം പ്രോസിക്യൂഷനാണെന്നും പ്രതികള്‍ക്ക് അതിനുള്ള അധികാരമില്ലെന്നും പ്രോസിക്യൂഷനു വേണ്ടി ഹാജരായ അഭിഭാഷക ബീന പറഞ്ഞു. തുടര്‍ന്നാണ് കോടതി സര്‍ക്കാരിന്റെ വിശദീകരണം കേള്‍ക്കാന്‍ കേസ് മാറ്റിയത്.
നിയമസഭയിലെ പൊതുമുതല്‍ നശിപ്പിച്ചതിന് കഴിഞ്ഞ സഭയിലെ ആറ് എല്‍.ഡി.എഫ് എം.എല്‍.എമാര്‍ക്കെതിരേയാണ് കേസ്. വി. ശിവന്‍കുട്ടിയായിരുന്നു ഒന്നാം പ്രതി. ഇപ്പോഴത്തെ മന്ത്രിമാരായ ഇ.പി ജയരാജന്‍, കെ.ടി ജലീല്‍ എന്നിവരും കെ. അജിത്, കെ. കുഞ്ഞഹമ്മദ്, സി.കെ സദാശിവന്‍ എന്നിവരുമായിരുന്നു മറ്റു പ്രതികള്‍.
നേരത്തെ പ്രതികളിലൊരാളായ മുന്‍ എം.എല്‍.എ വി ശിവന്‍കുട്ടിയുടെ അപേക്ഷയെ തുടര്‍ന്ന് കേസ് പിന്‍വലിക്കാന്‍ സര്‍ക്കാര്‍ തീരുമാനിച്ചിരുന്നു. കേസ് പിന്‍വലിക്കാനുള്ള നീക്കത്തിനെതിരേ പ്രതിപക്ഷനേതാവ് രമേശ് ചെന്നിത്തല നല്‍കിയ ഹരജിയും കോടതിയുടെ മുന്നിലുണ്ട്.