ന്യൂഡല്‍ഹി: സാധ്വി പ്രഗ്യാ സിങ്ങിനു പിന്നാലെ മലേഗാവ് ഭീകരാക്രമണക്കേസിലെ രണ്ടുപ്രതികള്‍ കൂടി ലോക്‌സഭാ തെരഞ്ഞെടുപ്പില്‍ മല്‍സരത്തിന്. മലേഗാവ് ഉള്‍പ്പെടെ സംഘ്പരിവാര്‍ നടത്തിയ ബോംബ് സ്‌ഫോടനങ്ങള്‍ക്ക് സ്‌ഫോടകവസ്തുക്കള്‍ എത്തിച്ചുവെന്ന ആരോപണം നേരിടുന്ന മേജര്‍ രമേശ് ഉപാധ്യായ്, സുധാകര്‍ ചതുര്‍വേദി എന്നിവരാണ് കേസിലെ പ്രതികളായി മല്‍സരരംഗത്തുള്ളത്. അഖിലേന്ത്യാ ഹിന്ദുമഹാസഭയുടെ സ്ഥാനാര്‍ഥിയായി രമേശ് ഭല്ലിയയിലും സ്വതന്ത്രനായി സുധാകര്‍ മിര്‍സാപൂരിലുമാണ് മല്‍സരിക്കുന്നത്. രണ്ടുമണ്ഡലങ്ങളും കിഴക്കന്‍ ഉത്തര്‍പ്രദേശിലാണ് സ്ഥിതിചെയ്യുന്നത്. കഴിഞ്ഞദിവസം ഇരുവരും നാമനിര്‍ദേശപത്രിക സമര്‍പ്പിച്ചു.

കേസില്‍ 2008ലാണ് രമേശും സുധാകറും അറസ്റ്റിലായത്. കേസിലെ പ്രധാനപ്രതിയായ കേണല്‍ പ്രസാദ് പുരോഹിതുമായി ചേര്‍ന്ന് രാജ്യത്തു പ്രത്യേക ഹിന്ദുരാഷ്ട്രത്തിനുള്ള ഭരണഘടന തയ്യാറാക്കാനും മുസ്‌ലിംകളോട് പ്രതികാരം ചെയ്യാനും ആസൂത്രണംചെയ്‌തെന്നതാണ് രമേശിനെതിരായ ആരോപണം. കേസിലെ പ്രധാന പ്രതികളായ മൂന്നുപേര്‍ക്കെതിരെയും യു.എ.പി.എ ഉള്‍പ്പെടെയുള്ള കുറ്റങ്ങള്‍ നിലനില്‍ക്കെയാണ് മല്‍സരിക്കുന്നത്. ലോക്‌സഭാ തെരഞ്ഞെടുപ്പിന്റെ അവസാനഘട്ടമായ മെയ് 19നാണ് ഭല്ലിയയിലും മിര്‍സാപൂരിലും വോട്ടെടുപ്പ് നടക്കുന്നത്.