കോഴിക്കോട്: മടപ്പള്ളി കോളജില്‍ നടന്ന കാലിക്കറ്റ് യൂനിവേഴ്‌സിറ്റി ഇംഗ്ലീഷ് ബിരുദ പരീക്ഷയുടെ മൂല്ല്യ നിര്‍ണയ ക്യാംപ് സ്വാശ്രയ കോളജ് അധ്യാപകര്‍ ബഹിഷ്‌കരിച്ചു.
മുന്‍വര്‍ഷങ്ങളില്‍ മടപ്പള്ളി കോളജില്‍ നടന്ന ഇംഗ്ലീഷ് പരീക്ഷകളുടെ ഏഴോളം മൂല്യനിര്‍ണയ ക്യാംപുകളുടെ ബില്ല് യൂനിവേഴ്സ്റ്റി പാസാക്കിയിട്ടില്ല. ഇതിനെക്കുറിച്ച് ക്യാംപ് ചെയര്‍മാനോട് അന്വേഷിച്ചെങ്കിലും തൃപ്തികരമല്ലാത്തതും നിരുത്തരവാദപരവുമായ മറുപടിയാണ് ലഭിച്ചത്. ഇതിനെത്തുടര്‍ന്നാണ് വിവിധ സ്വാശ്രയ കോളജുകളിലുള്ള നാല്‍പ്പത്തി രണ്ടോളം അധ്യാപകര്‍ ക്യാംപ് ബഹിഷ്‌ക്കരിച്ചത്.
ഏഴോളം ക്യാംപുകളുടെതായി ഇരുപതിനായിരത്തോളം രൂപ പല അധ്യാപകര്‍ക്കും ലഭിക്കാനുണ്ട്. ഇത് ലഭിക്കുമെന്ന പ്രതീക്ഷയിലായിരുന്നു അധ്യാപകര്‍. എന്നാല്‍ യൂനിവേഴ്‌സിറ്റിയില്‍ അന്വേഷിച്ചപ്പോള്‍ പല മൂല്യനിര്‍ണയത്തിന്റെയും ബില്ല് കിട്ടിയിട്ടില്ലെന്നാണ് അറിയാന്‍ കഴിഞ്ഞത്. ഇക്കാര്യം ക്യാംപ് ചെയര്‍മാനോട് അന്വേഷിച്ചപ്പോള്‍ ബില്ലിന്റെ കാര്യമൊന്നും തനിക്കറിയില്ലെന്ന മറുപടിയാണ്‌ലഭിച്ചതെന്ന് അധ്യാപകര്‍ പറയുന്നു. ഇതോടെയാണ് ക്യാംപ് ബഹിഷ്‌ക്കരിക്കാന്‍ ഇവര്‍ തീരുമാനിച്ചത്.