പനമരം: കോടികള്‍ മുടക്കി വനംവകുപ്പ് നിര്‍മിച്ച കല്‍മതില്‍ കാട്ടാന തകര്‍ത്തു. പാതിരി സൗത്ത് സെക്ഷന്‍ വനത്തില്‍ ചെക്കിട്ടയില്‍ വര്‍ഷങ്ങള്‍ക്ക് മുന്‍പ് നിര്‍മിച്ച കല്‍മതിലാണ് കഴിഞ്ഞ ദിവസം കാട്ടാനക്കൂട്ടം തകര്‍ത്ത്.
മുന്‍പ് തകര്‍ത്ത കല്‍മതില്‍ പുനര്‍നിര്‍മിക്കണമെന്ന് കര്‍ഷകര്‍ ആവശ്യപ്പെട്ടിട്ടും നടപ്പാക്കത്തതില്‍ പ്രതിഷേധിച്ച് സമരത്തിന് ഒരുങ്ങവേയാണ് ഇതേ മതിലിന്റെ മറ്റൊരിടം കൂടി കാട്ടാനക്കൂട്ടം തകര്‍ത്തത്. ചെക്കിട്ട കോളനിയോട് ചേര്‍ന്ന് കാട്ടാന തകര്‍ത്ത മതിലിന് സമീപം വനത്തില്‍ മൃഗങ്ങള്‍ക്ക് കുടിവെള്ളം ഒരുക്കുന്നതിനായി വനം വകുപ്പ് വലിയകുളം നിര്‍മിക്കുകയും ഇതിനടുത്ത് എത്തുന്ന കാട്ടാനകളാണ് പിന്നീട് മതില്‍ തകര്‍ത്ത് കൃഷിയിടത്തിലേക്ക് ഇറങ്ങുന്നതെന്നും കോളനിക്കാര്‍ പറയുന്നു. കല്‍മതില്‍ തകര്‍ത്തതിന് ശേഷം പ്രദേശത്ത് കാട്ടാന ശല്യം അതിരൂക്ഷമാണ്.
കൃഷിയിടത്തിലിറങ്ങിയ കാട്ടാനക്കൂട്ടം നിരവധി കര്‍ഷകരുടെ കൃഷികള്‍ നശിപ്പിച്ചു. മതില്‍ തകര്‍ന്നതോടെ കൂട്ടമായാണ് ആനകള്‍ ഇതുവഴി കൃഷിയിടത്തിലെത്തുന്നത്. സന്ധ്യമയങ്ങുന്നതിന് മുന്‍പ് ഇറങ്ങുന്ന കാട്ടാനകള്‍ നേരം പുലര്‍ന്നാലും തിരിച്ച് പോകാത്തത് പത്രവിതരണക്കാര്‍ക്കും ക്ഷീരകര്‍ഷകര്‍ക്കും ദുരിതമാകുന്നു.
കാര്‍ഷകര്‍ കൃഷിയിട സംരക്ഷണത്തിനായി സ്ഥാപിച്ച വൈദ്യുതവേലിയും തകര്‍ത്താണ് കാട്ടാനക്കൂട്ടം കൃഷകള്‍ നശിപ്പിക്കുന്നത്. യുദ്ധകാലടിസ്ഥാനത്തില്‍ കാട്ടാന തകര്‍ത്ത കല്‍മതില്‍ പുനര്‍നിര്‍മിക്കാനുള്ള നടപടിയുണ്ടാകണമെന്നാണ് നാട്ടുകാരുടെ ആവശ്യം.