താനൂര്‍: മരം കടപുഴകി വീണ് ഗതാഗതം തടസപ്പെട്ടു. പുത്തന്‍തെരു വി.ആര്‍ നായനാര്‍ ഗ്രന്ഥാലയത്തിന് സമീപത്തെ കൂറ്റന്‍ മരമാണ് വീണത്. തിങ്കളാഴ്ച വൈകിട്ട് നാലരയോടെയാണ് അപകടമുണ്ടായത്. മരത്തിന്റെ അടിഭാഗം ദ്രവിച്ചത് കാരണമാണ് കടപുഴകി വീണത്. മരം റോഡിലേക്ക് വീണെങ്കിലും ഈ സമയം വാഹനങ്ങളൊന്നും പോകാതിരുന്നതിനാല്‍ വന്‍ദുരന്തമാണ് ഒഴിവായത്.
തിരൂരില്‍നിന്നു ഫയര്‍ഫോഴ്‌സ് യൂനിറ്റെത്തി നാട്ടുകാരുടെ സഹായത്തോടെ മരം മുറിച്ച് മാറ്റി ഒരു മണിക്കൂറിനകം ഗതാഗതം പുനഃസ്ഥാപിച്ചു. മരത്തിന്റെ വീഴ്ചയില്‍ വൈദ്യുതി ലൈനുകള്‍ പൊട്ടി. വൈദ്യതി ബന്ധവും താറുമാറായി കെ.എസ്.ഇ.ബി ജീവനക്കാരും താനൂര്‍ പൊലിസും സംഭവ സ്ഥലത്തെത്തി.