ജിദ്ദ: അൽഹറാസാത്ത് ഭീകര സംഘം മക്കയിലെ വിശുദ്ധ ഹറമിലെ ഇമാമിനെ വധിക്കാൻ പദ്ധതിയിട്ടിരുന്നതായി വിവരം. അവസാന നിമിഷം ഹറം ഇമാം ഭീകരരുടെ കൈയിൽനിന്ന് രക്ഷപ്പെടുകയായിരുന്നു. ഹറം ഇമാമിനെ വധിക്കാൻ ഭീകര സംഘം നേതാവ് മൂന്നാം പ്രതിയെ ചുമതലപ്പെടുത്തുകയായിരുന്നു. ഹറമിൽനിന്ന് പുറത്തിറങ്ങുന്നതിനിടെ ഇമാമിനെ വെടിവെച്ചു കൊല്ലാനാണ് മൂന്നാം പ്രതിക്ക് നിർദേശം നൽകിയിരുന്നത്.
ഇതിനായി മൂന്നാം പ്രതിക്ക് കൈത്തോക്കും നൽകി.
ആക്രമണം ആസൂത്രണം ചെയ്ത ദിവസം പതിവിന് വിപരീതമായി ഇമാം ഹറമിൽനിന്ന് പുറത്തിറങ്ങാൻ വൈകി. ഇതാണ് ഇമാമിന്റെ ജീവൻ രക്ഷിക്കാൻ ഇടയാക്കിയത്. ഇമാം ഹറമിൽനിന്ന് പുറത്തിറങ്ങാൻ വൈകിയതോടെ ഇമാമിനെ വെടിവെച്ചു കൊല്ലാൻ പദ്ധതി ഇട്ട ഭീകരൻ രക്ഷപ്പെടുകയും ഭീകര സംഘത്തിന്റെ താവളത്തിലേക്ക് മടങ്ങുകയുമായിരുന്നു.
മസ്ജിദുന്നബവി ഭീകരാക്രമണത്തിൽ പങ്കുള്ള അൽഹറാസാത്ത് ഭീകര സംഘത്തിലെ 46 പേരെ അറസ്റ്റ് ചെയ്തതായി ആഭ്യന്തര മന്ത്രാലയം നേരത്തെ അറിയിച്ചിരുന്നു. ഇക്കൂട്ടത്തിൽ 32 പേർ സഊദികളും അവശേഷിക്കുന്ന 14 പേർ പാക്കിസ്ഥാൻ, യെമൻ, ഈജിപ്ത്, ജോർദാൻ, സുഡാൻ എന്നിവിടങ്ങളിൽ നിന്നുള്ളവരുമാണ്.
അതേ സമയം അൽഹറാസാത്ത് ഭീകര സംഘത്തിൽപെട്ട ഒമ്പതു പ്രതികളെ കഴിഞ്ഞ ദിവസം റിയാദിലെ പ്രത്യേക കോടതി ശിക്ഷിച്ചിരുന്നു. സംഘം നേതാവ് അടക്കം മൂന്നു പേർക്ക് വധശിക്ഷയാണ് കോടതി വിധിച്ചത്. അവശേഷിക്കുന്നവർക്ക് 25 വർഷം വരെ തടവും ശിക്ഷ പൂർത്തിയാക്കിയ ശേഷം തത്തുല്യ കാലത്തേക്കുള്ള വിദേശയാത്രാ വിലക്കുമാണ് കോടതി വിധിച്ചത്. എട്ടാം പ്രതിയായ വിദേശിയെ ശിക്ഷ പൂർത്തിയാക്കിയ ശേഷം നാടുകടത്തും. എട്ടാം പ്രതിക്ക് 16 വർഷം തടവാണ് കോടതി വിധിച്ചത്.