തൃക്കരിപ്പൂര്‍: ഫാഷന്‍ ഗോള്‍ഡ് ഇടപാട് കേസുമായി ബന്ധപ്പെട്ട് ഫാഷന്‍ ഗോള്‍ഡ് കമ്പനി ചെയര്‍മാന്‍ എം.സി ഖമറുദ്ദീന്‍ എം.എല്‍.എ, മാനേജിങ് ഡയരക്്ടര്‍ ടി.കെ പൂക്കോയ തങ്ങള്‍ എന്നിവരുടെ വീട്ടില്‍ റെയ്ഡ്. എം.സി ഖമറുദ്ദീന്റെ പടന്ന എടച്ചാക്കൈയിലെ വീട്ടിലും പൂക്കോയ തങ്ങളുടെ ചന്തേര പൊലിസ് സ്റ്റേഷന്‍ പരിസരത്തെ വീട്ടിലുമാണ് ചന്തേര സി.ഐ നാരായണന്റെ നേതൃത്വത്തില്‍ ഇന്നലെ രാവിലെ റെയ്ഡ് നടത്തിയത്.
റെയ്ഡ് നടക്കുമ്പോള്‍ ഇരുവരും വീട്ടിലുണ്ടായിരുന്നില്ല.
ജ്വല്ലറി നിക്ഷേപങ്ങളുമായി ബന്ധപ്പെട്ട ചില രേഖകള്‍ കണ്ടെടുത്തെന്ന് പൊലിസ് അറിയിച്ചു. കാഞ്ഞങ്ങാട് ഡിവൈ.എസ്.പിയുടെ പ്രത്യേക നിര്‍ദേശപ്രകാരമായിരുന്നു റെയ്ഡ്. കേസ് ക്രൈംബ്രാഞ്ചിന് കൈമാറുന്നതിന് മുന്നോടിയായാണ് റെയ്ഡ് നടന്നത്.
വഞ്ചനാ കേസുകള്‍ക്ക് പുറമെ ഫാഷന്‍ ഗോള്‍ഡ് ജ്വല്ലറി നിക്ഷേപകരുടെ പരാതിയില്‍ എം.സി ഖമറുദ്ദീനും പൂക്കോയ തങ്ങള്‍ക്കുമെതിരേ 78 ലക്ഷം രൂപയുടെ ചെക്ക് തട്ടിപ്പ് കേസും രജിസ്റ്റര്‍ ചെയ്തിരുന്നു. കഴിഞ്ഞ വര്‍ഷം ഒക്ടോബറോടെ ഫാഷന്‍ ഗോള്‍ഡ് ജ്വല്ലറിയുടെ ശാഖകള്‍ പൂട്ടിയതിനെ തുടര്‍ന്നാണ് കള്ളാര്‍ സ്വദേശികളായ സുബൈര്‍, അഷ്‌റഫ് എന്നിവര്‍ നിക്ഷേപമായി നല്‍കിയ 78 ലക്ഷം രൂപ തിരികെ ആവശ്യപ്പെട്ടത്. പണത്തിനായി നിരന്തരം സമീപിച്ചതിനെ തുടര്‍ന്ന് ജ്വല്ലറി ചെയര്‍മാന്‍ എം.സി ഖമറുദ്ദീന്‍, പൂക്കോയ തങ്ങള്‍ എന്നിവര്‍ ഒപ്പിട്ട് ഇരുവര്‍ക്കുമായി അഞ്ച് ചെക്കുകള്‍ നല്‍കി.
എന്നാല്‍ ചെക്ക് മാറാന്‍ ബാങ്കില്‍ പോയപ്പോള്‍ അക്കൗണ്ടില്‍ പണമുണ്ടായിരുന്നില്ല. തുടര്‍ന്നാണ് ഇരുവരും കാഞ്ഞങ്ങാട് മജിസ്‌ട്രേറ്റ് കോടതിയെ സമീപിച്ചത്.
ചെക്ക് തട്ടിപ്പ് കേസില്‍ ചെയര്‍മാനും മാനേജിങ് ഡയരക്്ടര്‍ക്കുമെതിരേ കോടതി സമന്‍സ് അയച്ചതായാണ് റിപ്പോര്‍ട്ട്. കണ്ണൂര്‍ ജില്ലക്കാരായ നിക്ഷേപകരടക്കം അഞ്ച് പേരില്‍ നിന്നായി 29 ലക്ഷം തട്ടിയെന്ന പരാതിയില്‍ ചന്തേര പൊലിസ് അഞ്ച് കേസുകള്‍ കൂടി രജിസ്റ്റര്‍ ചെയ്തിരുന്നു.
അഞ്ച് പേരില്‍ നിന്നായി 75 ലക്ഷം തട്ടിയെടുത്തെന്ന് കാസര്‍കോട് ടൗണ്‍ പൊലിസ് സ്റ്റേഷനില്‍ വന്ന സമാന പരാതികള്‍ ജില്ലാ ക്രൈംബ്രാഞ്ചിന് കൈമാറി.