കോഴിക്കോട്: കേന്ദ്ര സര്‍ക്കാരിന്റെ വിവിധ പദ്ധതികള്‍ വിശദീകരിക്കുന്ന ഫോട്ടോ പ്രദര്‍ശനവും ബോധവല്‍ക്കരണ പരിപാടികളും ഒളവണ്ണയില്‍ ആരംഭിച്ചു. ഒളവണ്ണ പഞ്ചായത്ത് ഓഫിസിനോടു ചേര്‍ന്നുള്ള മാത്തറ ഇ.എം.എസ് ഹാളില്‍ നടന്ന ചടങ്ങ് കോഴിക്കോട് ബ്ലോക്ക് പഞ്ചായത്ത് പ്രസിഡന്റ് എന്‍. മനോജ്കുമാര്‍ ഉദ്ഘാടനം ചെയ്തു. ഗ്രാമപഞ്ചായത്ത് പ്രസിഡന്റ് കെ. തങ്കമണി അധ്യക്ഷയായി.
ശുചിത്വ ഭാരത അഭിയാനെക്കുറിച്ചു ശുചിത്വ മിഷന്‍ അസിസ്റ്റന്റ് കോഡിനേറ്റര്‍ രാധാകൃഷ്ണന്‍ ക്ലാസെടുത്തു. കോഴിക്കോട് ആകാശവാണി നിലയത്തിന്റെ നേതൃത്വത്തില്‍ വിവിധ കേരളീയ ക്ഷേത്രവാദ്യങ്ങളെ ഉള്‍പ്പെടുത്തിയുള്ള ശുകപുരം രാധാകൃഷ്ണന്‍ നയിച്ച താളവാദ്യ സംഗമവും അരങ്ങേറി. കേന്ദ്ര ഫീല്‍ഡ് പബ്ലിസിറ്റി ഡയരക്ടറേറ്റും കേന്ദ്ര പരസ്യ ദൃശ്യ പ്രചാരണ വിഭാഗവും സംയുക്തമായി സംഘടിപ്പിച്ച പ്രദര്‍ശനം നാളെ സമാപിക്കും.