തിരുവനന്തപുരം: മലയാളം സര്‍വകലാശാലയുമായി ബന്ധപ്പെട്ട ഭൂമി ഇടപാടുകളില്‍ പരാതികള്‍ പരിശോധിക്കാന്‍ ഗവര്‍ണറുടെ നിര്‍ദേശം. ഇതു ചൂണ്ടിക്കാട്ടി ഉന്നതവിദ്യാഭ്യാസ സെക്രട്ടറിക്കും സര്‍വകലാശാല വൈസ് ചാന്‍സലര്‍ക്കും ഗവര്‍ണര്‍ കത്തു നല്‍കി.
സര്‍വകലാശാലയ്ക്ക് സ്വന്തം കെട്ടിടം പണിയാന്‍ സര്‍ക്കാര്‍ വാങ്ങുന്ന ഭൂമിയുടെ നടപടിക്രമങ്ങള്‍ നിര്‍ത്തണമെന്നാവശ്യപ്പെട്ട് യൂത്ത് കോണ്‍ഗ്രസും മുസ്്‌ലിം ലീഗുമാണ് പരാതി നല്‍കിയിരുന്നത്.
ഈ പരാതികള്‍ അന്വേഷിച്ച് വേണ്ട നടപടികള്‍ സ്വീകരിക്കണമെന്നാണ് ഗവര്‍ണര്‍ നിര്‍ദേശിച്ചിരിക്കുന്നത്.
തിരൂര്‍ താലൂക്കിലെ ഭൂമി കെട്ടിടനിര്‍മാണത്തിന് അനുമതിയില്ലാത്ത ചതുപ്പാണെന്നും ഇവിടെ നടക്കുന്ന നിര്‍മാണപ്രവര്‍ത്തനങ്ങള്‍ നിര്‍ത്തിവയ്ക്കണമെന്നും പരാതിയില്‍ ആവശ്യപ്പെട്ടിരുന്നു. ഈ ഭൂമി ഏറ്റെടുക്കുന്നതിലൂടെ സംസ്ഥാന സര്‍ക്കാരിന് വലിയ സാമ്പത്തിക നഷ്ടം വരുത്തുമെന്നും പരാതിയില്‍ പറയുന്നു. ഭൂമി ഇടപാടിലേക്ക് ബാക്കി തുക നല്‍കണമെന്നാവശ്യപ്പെട്ട് ഉന്നതവിദ്യാഭ്യാസ വകുപ്പ് ഉത്തരവിറക്കിയിരുന്നു. വിഷയത്തില്‍ ഗവര്‍ണര്‍ അടിയന്തരമായി ഇടപെടണമെന്നാവശ്യപ്പെട്ടാണ് പരാതി നല്‍കിയത്.