സുല്‍ത്താന്‍ ബത്തേരി: കാലിക്കറ്റ് സര്‍വകലാശാല യൂനിയന്‍ ഇന്റര്‍സോണ്‍ കലോത്സവം 'വയനാര്‍ട്ട് 2019, അതിജീവനത്തിന്റെ ഉത്സവം' എന്ന പേരില്‍ നാളെ മുതല്‍ അഞ്ച് വരെ സുല്‍ത്താന്‍ ബത്തേരി സെന്റ് മേരീസ് കോളജില്‍ നടക്കും. കാലിക്കറ്റ് സര്‍വകലാശല യൂനിയന്റെ കലാമാമങ്കത്തിന് ആദ്യമായാണ് സുല്‍ത്താന്‍ ബത്തേരി വേദിയാകുന്നത്.
രണ്ട് ദശകങ്ങള്‍ക്ക് ശേഷമാണ് കാലിക്കറ്റ് സര്‍വകലാശാല കലോത്സവത്തിന് വയനാട് വേദിയാവുന്നത്. കാലിക്കറ്റ് സര്‍വകലാശാലയ്ക്ക് കീഴിലെ 436 കോളജുകളില്‍ നിന്നായി 5000ത്തിലധികം വിദ്യാര്‍ഥികള്‍ കലോത്സവത്തില്‍ മാറ്റുരയ്ക്കും. കലോത്സവത്തിന്റെ രജിസ്‌ട്രേഷന്‍ നടപടികള്‍ പൂര്‍ത്തിയായി. കോഴിക്കോട്, വയനാട്, മലപ്പുറം, തൃശൂര്‍, പാലക്കാട് ജില്ലകള്‍ക്ക് പുറമെ ലക്ഷദ്വീപില്‍ നിന്നുള്ള മത്സരാര്‍ഥികളും പങ്കെടുക്കും. മെയ് ഒന്ന്, രണ്ട് തിയതികളില്‍ ഒാഫ് സ്റ്റേജ് മത്സരങ്ങളും മെയ് മൂന്ന്, നാല്, അഞ്ച് തിയതികളില്‍ സ്റ്റേജ് മത്സരങ്ങളും നടക്കും.
അഞ്ചു വേദിയകളിലാണ് മത്സരങ്ങള്‍ അരങ്ങേറുന്നത്. അദിമന്യു, ഗൗരി ലങ്കേഷ്, ഗോവിന്ദ് പാന്‍സാരെ, കല്‍ബുര്‍ഗി, രോഹിത് വെമുല എന്നിവരുടെ നാമത്തിലാണ് വേദികള്‍. മെയ് മൂന്നിന് കലോത്സവത്തിന്റെ ഔപചാരിക ഉദ്ഘാടനം മുതിര്‍ന്ന ദൃശ്യമാധ്യമപ്രവര്‍ത്തകന്‍ അദിലാഷ് മോഹന്‍ നിര്‍വഹിക്കും. സിനിമതാരം സന്തോഷ് കീഴാറ്റൂര്‍ മുഖ്യാതിഥിയായിരിക്കും.
കലോത്സവത്തിന്റെ സമാപന സമ്മേളനം മെയ് അഞ്ചിന് വിദ്യാഭ്യാസ മന്ത്രി കെ.ടി ജലീല്‍ നിര്‍വഹിക്കും. വാര്‍ത്താ സമ്മേളനത്തില്‍ സംഘടക സമിതി ചെയര്‍മാന്‍ പി.ആര്‍ ജയപ്രകാശ്, കണ്‍വീനര്‍ ജോബിസണ്‍ ജയിംസ് തുടങ്ങിയവര്‍ പങ്കെടുത്തു.