കരുനാഗപ്പള്ളി(കൊല്ലം): കുലശേഖരം മഠത്തില്‍ ജങ്ഷന് സമീപം ബൈക്ക് കാറിലിടിച്ച് രണ്ട് വിദ്യാര്‍ഥികള്‍ മരിച്ചു. കോട്ടക്കുപുറം പുതുമണ്ണേല്‍ രാജേന്ദ്രന്‍- മഞ്ജു ദമ്പതികളുടെ മകന്‍ അക്ഷയ് രാജ് (17), കോട്ടക്കുപുറം കൂട്ടിങ്ങല്‍ കാര്‍മല്‍ പയസ് റോഡ്രിക്‌സ് - സൂനി ദമ്പതികളുടെ മകന്‍ അലന്‍ (17) എന്നിവരാണ് മരിച്ചത്. കുലശേഖരപുരം മോഡല്‍ ഹയര്‍സെക്കന്‍ഡറി സ്‌കൂളിലെ പ്ലസ് വണ്‍ വിദ്യാര്‍ഥികളാണ് ഇരുവരും.
ഇന്നലെ രാവിലെ 11.30 ഓടെ സിനിമ കണ്ട് തിരികെ വീട്ടിലേക്ക് വരും വഴിയായിരുന്നു അപകടം. അലന്‍ അപകട സ്ഥലത്തുവച്ചു തന്നെ മരിച്ചു. അക്ഷയ് രാജ് കരുനാഗപ്പള്ളിയിലെ സ്വകാര്യ ആശുപത്രിയില്‍ വച്ചാണ് മരിച്ചത്. അലന്റെ പിതാവ് അരുണാചല്‍പ്രദേശില്‍ സി.ആര്‍.പി.എഫ് ജവാനാണ്. പിതാവ് എത്തിയതിനു ശേഷമേ സംസ്‌കാരം നടക്കൂ. അക്ഷയ് രാജിന്റെ മൃതദേഹം നാളെ പോസ്റ്റുമോര്‍ട്ടം നടത്തി ബന്ധുക്കള്‍ക്ക് വിട്ടു കൊടുക്കും. അനുഷയാണ് അക്ഷയ് രാജിന്റെ സഹോദരി. അലന്റെ സഹോദരി അലീന. ഇരുവരുടേയും മൃതദേഹങ്ങള്‍ കരുനാഗപ്പള്ളി താലൂക്കാശുപത്രി മോര്‍ച്ചറിയില്‍ സൂക്ഷിച്ചിരിക്കുകയാണ്.