മോസ്‌കോ: ഇന്ത്യ-ചൈന അതിര്‍ത്തി പ്രശ്‌നത്തില്‍ മധ്യസ്ഥതയ്ക്കില്ലെങ്കിലും ഇരു രാജ്യങ്ങളുടെയും വിദേശകാര്യമന്ത്രിമാര്‍ തമ്മില്‍ മോസ്‌കോയില്‍ ചര്‍ച്ച നടത്തുന്നതിന് വേണ്ട സൗകര്യങ്ങള്‍ ചെയ്യാമെന്ന് റഷ്യ.
ഷാങ്ഹായ് കോ-ഓപറേഷന്‍ ഓര്‍ഗനൈസേഷന്‍(എസ്.സി.ഒ) അംഗരാജ്യങ്ങള്‍ തമ്മില്‍ പരസ്പര വിശ്വാസം ഉണ്ടാക്കുന്നതിനു വേണ്ടിയാണിത്. ഇന്ത്യയും ചൈനയും തമ്മിലെ പ്രശ്‌നങ്ങള്‍ പരിഹരിക്കുന്നതിന് ചര്‍ച്ച നടത്താന്‍ റഷ്യ എല്ലാ അവസരവും ഉപയോഗപ്പെടുത്തുമെന്ന് റഷ്യന്‍ ഡെപ്യൂട്ടി ചീഫ് ഓഫ് മിഷന്‍ റൊമാന്‍ ബബുഷ്‌കിന്‍ പറഞ്ഞു. ഇന്ന് മോസ്‌കോയില്‍ എസ്.സി.ഒ വിദേശകാര്യമന്ത്രിമാരുടെ യോഗം നടക്കാനിരിക്കെയാണ് റഷ്യയുടെ പ്രസ്താവന. റഷ്യ മധ്യസ്ഥത വഹിക്കുമോ എന്ന ചോദ്യത്തിന് ഇരു രാജ്യങ്ങളും ആവശ്യപ്പെടാതെ അതുണ്ടാവില്ലെന്ന് ബബുഷ്‌കിന്‍ വ്യക്തമാക്കി.
മേയിലെ ലഡാക്ക് സംഘര്‍ഷത്തിനു ശേഷം ആദ്യമായാണ് ഇന്ത്യന്‍ വിദേശകാര്യമന്ത്രി എസ്. ജയശങ്കറും ചൈനീസ് വിദേശകാര്യമന്ത്രി വാങ് യീയും മുഖാമുഖം വരുന്നത്. ഷാങ്ഹായ് ഉച്ചകോടിയോടനുബന്ധിച്ച് കഴിഞ്ഞദിവസം ഇന്ത്യ-ചൈന പ്രതിരോധമന്ത്രിമാര്‍ തമ്മില്‍ കൂടിക്കാഴ്ച നടന്നെങ്കിലും ഫലമുണ്ടായില്ല. അതിനു ശേഷമാണ് പാങ്‌ഗോങ്ങില്‍ വീണ്ടും സംഘര്‍ഷാവസ്ഥ ഉണ്ടായിരിക്കുന്നത്.
ചര്‍ച്ചയിലൂടെ ഇരു രാജ്യങ്ങള്‍ക്കും സ്വീകാര്യമായ പരിഹാരം ഉരുത്തിരിയുമെന്നാണ് റഷ്യ പ്രതീക്ഷിക്കുന്നതെന്നും ഉച്ചകോടിയില്‍ ഇന്ത്യ പാകിസ്താനുമായും ഒന്നിച്ചിരിക്കാന്‍ സമയം കണ്ടെത്തുമെന്നാണ് കരുതുന്നതെന്നും ബബുഷ്‌കിന്‍ പറഞ്ഞു. പാക് വിദേശകാര്യമന്ത്രി ഷാ മഹ്മൂദ് ഖുറൈശിയും എസ്.സി.ഒ ഉച്ചകോടിയില്‍ പങ്കെടുക്കുന്നുണ്ട്.
അതിനിടെ ഉച്ചകോടിയില്‍ എല്ലാ അംഗരാജ്യങ്ങളുടെ വിദേശകാര്യമന്ത്രിമാരുമായും വാങ് യീ കൂടിക്കാഴ്ച നടത്തുമെന്ന് ചൈനീസ് വിദേശകാര്യ വക്താവ് ഴാവോ ലിജിയാന്‍ അറിയിച്ചു.