എടപ്പാള്‍: വിദ്യാര്‍ഥികള്‍ക്കിടയില്‍ കഞ്ചാവ് വില്‍പന നടത്തുന്നതിനിടയില്‍ ഒരാള്‍ പിടിയില്‍. ചമ്രവട്ടം കള്ളുവെട്ടിക്കല്‍ ഹൗസ് ഇബ്രാഹിമി(28)നെയാണ് പൊന്നാനി എസ്.ഐ ശശിധരന്‍ മേലയിലിന്റെ നേതൃത്വത്തിലുള്ള പൊലിസ് സംഘം അറസ്റ്റ് ചെയ്തത്.
കാടഞ്ചേരി ഹയര്‍ സെക്കന്‍ഡറി സ്‌കൂളിന് സമീപം വിദ്യാര്‍ഥികള്‍ക്കിടയില്‍ കഞ്ചാവ് വില്‍പന നടത്തുന്നതിനിടയിലാണ് ഇയാളെ  പൊലിസ് പിടികൂടിയത്. വിദ്യാര്‍ഥികള്‍ക്കിടയില്‍ കഞ്ചാവ് ഉപയോഗം വ്യാപകമാകുന്നതായും വില്‍പനക്കാര്‍ വിദ്യാര്‍ഥികളെ ലക്ഷ്യം വെക്കുന്നതായുമുള്ള വിവരത്തെത്തുടര്‍ന്നാണ് പൊലിസ് പരിശോധന കര്‍ശനമാക്കിയത്. സമാന കേസില്‍ കഴിഞ്ഞ ഒരു മാസത്തിനുള്ളില്‍ പൊന്നാനി പൊലിസിന്റെ പിടിയിലാകുന്ന നാലാമത്തെയാളാണ് ഇബ്രാഹിം.
ഇയാള്‍ക്കെതിരേ ജുവനൈല്‍ ജസ്റ്റിസ് ആക്റ്റ് പ്രകാരമുള്ള വകുപ്പും ചേര്‍ത്താണ് പൊലിസ്  കേസ് രജിസ്റ്റര്‍ ചെയ്തിട്ടുള്ളത്.
കോടതിയില്‍ ഹാജരാക്കിയ ഇയാളെ റിമാന്‍ഡ് ചെയ്തു. വരും ദിവസങ്ങളില്‍ കൂടുതല്‍ പേര്‍ പിടിയിലാകുമെന്നും പലരും നിരീക്ഷണത്തിലാണെന്നും പൊലിസ് അറിയിച്ചു.