പുതുക്കാട്: ആദ്യകാല മണല്‍ വാരല്‍ തൊഴിലാളികളുടെ അനുഭവ സമ്പത്തിലൂടെ പ്രളയത്തില്‍ നിന്നും ജീവിതത്തിലേക്ക് കൈപിടിച്ച് ഉയര്‍ത്തിയത് 50ഓളം പേരെ. വരന്തരപ്പിള്ളി മനയ്ക്കലക്കടവില്‍ നിന്നും പുഴ ഗതി മാറി ഒഴുകിയതുമൂലം കടവില്‍ നിന്നും തോട്ടുമുഖം വരെ ഒറ്റപ്പെട്ടുപോയ 20ഓളം കുടുംബങ്ങളെയാണ് തൊഴിലാളികളായ മൂവര്‍സംഘം രക്ഷപ്പെടുത്തിയത്. തൊഴിലാളികളായ കുമാരന്‍, രാജന്‍, ഷിജു എന്നിവരാണ് രക്ഷാപ്രവര്‍ത്തനത്തിന് നേതൃത്വം നല്‍കിയത്.
15ന് രാത്രിയോടെ പുഴ ഗതിമാറുകയും പെട്ടെന്ന് വെള്ളം ഉയരുകയും ചെയ്തതോടെ പലര്‍ക്കും സുരക്ഷിത സ്ഥാനങ്ങളിലേക്ക് മാറാന്‍ കഴിഞ്ഞിരുന്നില്ല. വെള്ളം ക്രമാതീതമായി ഉയര്‍ന്നതോടെ ആളുകള്‍ വീടുകളുടെ മുകളില്‍ അഭയം തേടുകയായിരുന്നു. 16ന് രാവിലെ മുതല്‍ രക്ഷപ്രവര്‍ത്തനത്തിന് ശ്രമം നടത്തിയിരുന്നു. നാട്ടുകാര്‍ ആദ്യം ചെങ്ങാടം നിര്‍മിച്ച് രക്ഷാപ്രവര്‍ത്തനം നടത്താന്‍ ശ്രമിച്ചെങ്കിലും ഒഴുക്കില്‍പ്പെട്ട് ഒരു അടി പോലും മുന്നോട്ട് നീങ്ങാന്‍ ആയില്ല. തുടര്‍ന്നാണ് ചിമ്മിനി ഡാമില്‍ നിന്നും എത്തിച്ച ഫൈബര്‍ ബോട്ട് ഉപയോഗിച്ച് രക്ഷാപ്രവര്‍ത്തനം ആരംഭിച്ചത്. എന്നാല്‍ ശക്തമായ ഒഴുക്കില്‍ ബോട്ട് നിയന്ത്രിക്കുന്നത് ഒരു വെല്ലുവിളിയായ സമയത്താണ് ആദ്യകാലത്ത് മണല്‍വാരല്‍ നടത്തിയിരുന്ന ഇവര്‍ രക്ഷാപ്രവര്‍ത്തനത്തിന് ഇറങ്ങിയത്.
ഇവരോടൊപ്പം നാട്ടുകാരും രക്ഷാപ്രവര്‍ത്തനത്തിന് ഇറങ്ങി. ആദ്യം മനയ്ക്കലകടവില്‍ നിന്നുമാണ് രക്ഷാപ്രവര്‍ത്തനം ആരംഭിച്ചത്. പിന്നീട് തോട്ടുമുഖം പുഴയുടെ തീരം വരെയുള്ള ആളുകളെ സുരക്ഷിതമായി കരയ്ക്ക് എത്തിക്കാനായി. വളര്‍ത്തുമൃഗങ്ങള്‍ ഉള്‍പ്പെടെ രക്ഷപ്പെടുത്താന്‍ ഇവര്‍ ശ്രമിച്ചു. മൂന്ന് മാസം പ്രായമുള്ള കുട്ടിയെ എടുത്ത് ബോട്ടില്‍ കയറാന്‍ വിമുഖത കാണിച്ച മാതാപിതാക്കളെയും സംഘം രക്ഷപ്പെടുത്തി. ഇതിനിടെ സുഹൃത്തിനെ തേടി ഇറങ്ങിയ ഒരാളെ ഒഴുക്കില്‍ കാണാതായത് പരിഭ്രാന്തി പരത്തിയിരുന്നു. തെരച്ചിലില്‍ ഇയാളെ ഒരു വീടിന് മുകളില്‍ കണ്ടെത്തുകയായിരുന്നു.
രാവിലെ തുടങ്ങിയ രക്ഷാ പ്രവര്‍ത്തനം രാത്രി എട്ട് മണിയോടെയാണ് അവസാനിച്ചത്. എന്‍.ആര്‍.ഡി.എഫ് സേന എത്തുമെന്ന് പറഞ്ഞ് കാത്തിരുന്ന് വീടുകളുടെ മുകളില്‍ അഭയം തേടിയ കുടുംബങ്ങള്‍ക്കാണ് നാട്ടുകാരായ തൊഴിലാളികള്‍ രക്ഷകരായത്. വരന്തരപ്പിള്ളി സ്വദേശികളായ സുദേവന്‍, ശ്രീജിത്ത്, ബാബു, ജയരാമന്‍ തുടങ്ങിയവരും രക്ഷാപ്രവര്‍ത്തനത്തില്‍ പങ്കാളികളായിരുന്നു. രക്ഷാപ്രവര്‍ത്തനത്തിന് അധികൃതരുടെ പിന്തുണയും ലഭിക്കാതെ വന്നതോടെ ജീവന്‍ പണയംവെച്ച് രക്ഷാപ്രവര്‍ത്തനത്തിനിറങ്ങിയ തൊഴിലാളികള്‍ക്ക് അകമറിഞ്ഞ നന്ദിയാണ് മനക്കല്‍കടവ് ഗ്രാമം നേരുന്നത്.