തെഹ്‌റാന്‍: ഇറാന്റെ അസംസ്‌കൃത എണ്ണ ഉല്‍പ്പാദനം പൂജ്യത്തിലെത്തിക്കുകയെന്ന ലക്ഷ്യത്തോടെ അമേരിക്ക ഏര്‍പ്പെടുത്തിയ ഉപരോധം നിലനില്‍ക്കുന്നുണ്ടെങ്കിലും അതു വകവയ്ക്കാതെ എണ്ണ കയറ്റുമതിയുമായി ഇറാന്‍ മുന്നോട്ടുപോവുമെന്ന് ഇറാന്‍ പ്രസിഡന്റ് ഹസന്‍ റൂഹാനി. അമേരിക്കയുടേത് തെറ്റായ തീരുമാനമാണ്.
എന്നാലത് നടപ്പിലാക്കാന്‍ സമ്മതിക്കില്ല. വരും മാസങ്ങളില്‍ ഇറാന്‍ എണ്ണ കയറ്റുമതി തുടരുന്നത് അമേരിക്കക്കാര്‍ കാണും- അദ്ദേഹം പറഞ്ഞു. ഇറാനില്‍ നിന്ന് എണ്ണ ഇറക്കുമതി ചെയ്യുന്ന രാജ്യങ്ങള്‍ മെയ് 1 മുതല്‍ അത് നിര്‍ത്തിയില്ലെങ്കില്‍ അവരും ഉപരോധം നേരിടേണ്ടിവരുമെന്ന് അമേരിക്ക മുന്നറിയിപ്പു നല്‍കിയിരുന്നു. യു.എസ് ഭീഷണിയോടെ അന്താരാഷ്ട്ര കമ്പോളത്തില്‍ എണ്ണ വില കുത്തനെ ഉയര്‍ന്നിരുന്നു.