തിരുവനന്തപുരം: കാസര്‍കോട് ലോക്‌സഭാ മണ്ഡലത്തിലെ തൃക്കരിപ്പൂരില്‍ കള്ളവോട്ട് ചെയ്‌തെന്ന പരാതി ഉയര്‍ന്ന ശ്യാംകുമാറിനെതിരെ കേസെടുക്കാന്‍ മുഖ്യതെരഞ്ഞെടുപ്പ് ഓഫിസറുടെ നിര്‍ദേശം.

ഇയാള്‍ കള്ളവോട്ട് ചെയ്‌തെന്ന് നേരത്തെ ജില്ലാ കലക്ടര്‍ നല്‍കിയ അന്വേഷണറിപ്പോര്‍ട്ടിന്റെ അടിസ്ഥാനത്തിലാണ് നടപടി.
മാധ്യമവാര്‍ത്തകളുടെ അടിസ്ഥാനത്തിലാണ് തൃക്കരിപ്പൂരിലെ കള്ളവോട്ടിനെക്കുറിച്ച് അന്വേഷിക്കാന്‍ കേന്ദ്ര തെരഞ്ഞെടുപ്പ് കമ്മിഷണര്‍ ജില്ലാ കലക്ടറോട് നിര്‍ദേശിച്ചത്.

സംഭവത്തില്‍ കുറ്റക്കാരായ പോളിംഗ് ഉദ്യോഗസ്ഥര്‍ക്കെതിരെ അന്വേഷണം നടത്തി ഏഴു ദിവസത്തിനകം തുടര്‍നടപടികള്‍ക്കായി റിപ്പോര്‍ട്ട് നല്‍കാനും കലക്ടറോട് മുഖ്യതെരഞ്ഞെടുപ്പ് ഓഫിസര്‍ ആവശ്യപ്പെട്ടിട്ടുണ്ട്.

ഇതുപ്രകാരം ജില്ലാ കലക്ടര്‍, പോളിംഗ് ഉദ്യോഗസ്ഥര്‍, അസിസ്റ്റന്റ് റിട്ടേണിംഗ് ഓഫീസര്‍, സെക്ടറല്‍ ഓഫിസര്‍ എന്നിവരുടെ മൊഴി രേഖപ്പെടുത്തിയിരുന്നു. ദൃശ്യങ്ങളില്‍ കണ്ടയാള്‍ ശ്യാംകുമാര്‍ എന്നയാളാണെന്ന് ബൂത്ത് ലെവല്‍ ഓഫീസര്‍, സെക്ടറല്‍ ഓഫീസര്‍ എന്നിവര്‍ തിരിച്ചറിഞ്ഞതിനെത്തുടര്‍ന്ന് ഇയാളില്‍ നിന്നും പിന്നീട് മൊഴിയെടുത്തു.

കലക്ടറുടെ റിപ്പോര്‍ട്ട് പ്രകാരം ശ്യാംകുമാര്‍ വൈകിട്ട് 6.20നും 7.26 നുമായി രണ്ടുതവണ ബൂത്ത് നമ്പര്‍ 48ല്‍ വോട്ട് ചെയ്തിട്ടുണ്ട്. ഇതുപ്രകാരം ഇയാള്‍ കള്ളവോട്ട് ചെയ്തതായി പ്രഥമദൃഷ്ട്യാ നിഗമനത്തില്‍ എത്താമെന്ന് റിപ്പോര്‍ട്ടില്‍ വ്യക്തമാക്കുന്നു.