അരീക്കോട്: നിരവധി ജനങ്ങള്‍ ആശ്രയിക്കുന്ന അരീക്കോട് പൂങ്കുടി പാണ്ടിക്കുളം പുനരുദ്ധാരണം നടത്തി. പൊട്ടിപ്പൊളിഞ്ഞ് ഉപയോഗ ശൂന്യമായി നിന്നിരുന്ന കുളമാണു അരീക്കോട് ബ്ലോക്ക് പഞ്ചായത്തിനു കീഴില്‍ നീര്‍ത്തടസംയോജന പദ്ധതിയില്‍ ഉള്‍പ്പെടുത്തി ഏഴര ലക്ഷം രൂപ ചെലവിട്ട് അറ്റക്കുറ്റപ്പണി നടത്തിയത്.
കഴിഞ്ഞ ഭരണസമിതി കുളത്തിന്റെ നിര്‍മാണ പ്രവര്‍ത്തനത്തിനായി രണ്ടര ലക്ഷം രൂപ വകയിരുത്തിയിരുന്നെങ്കിലും പണം തികയാതെ വന്നതോടെ നിര്‍മാണ പ്രവര്‍ത്തനങ്ങള്‍ നടക്കാതെ പോവുകയായിരുന്നു. പുതിയ ഫണ്ട് ഉപയോഗിച്ച് നിര്‍മാണ പ്രവര്‍ത്തനങ്ങള്‍ പൂര്‍ത്തിയായതോടെ ജനങ്ങളുടെ ഏറെ നാളത്തെ ആവശ്യത്തിനാണു പരിഹാരമായത്. വേനല്‍ കടുക്കുന്നതോടെ വീട്ടാവശ്യങ്ങള്‍ക്കായി പ്രദേശ വാസികള്‍ കുളത്തിലെ വെള്ളത്തെയാണു ആശ്രയിക്കാറുള്ളത്.
അരീക്കോട് ബ്ലോക്ക് പഞ്ചായത്ത് പ്രസിഡന്റ് പറമ്പന്‍ ലക്ഷ്മി ഉദ്ഘാടനം ചെയ്തു. അരീക്കോട് ഗ്രാമ പഞ്ചായത്ത് പ്രസിഡന്റ് അമ്പായത്തിങ്ങല്‍ മുനീറ അധ്യക്ഷയായി. ജില്ലാ പഞ്ചായത്ത് അംഗം അഡ്വ. പി വി മനാഫ്, ബ്ലോക്ക് പഞ്ചായത്ത് സ്ഥിരസമിതി ചെയര്‍മ്മാന്‍ സി അബ്ദുറഹിമാന്‍ മാസ്റ്റര്‍, എം.പി.എ സിദ്ദീഖ്, വി.ഇ.ഒ ശിഹാബ് അരീക്കോട്, സി.ഡി.എസ് ഷീബ സംബന്ധിച്ചു.