അഹമ്മദാബാദ്: സസ്യ ഇന സംരക്ഷണ (പ്ലാന്റ് വെറൈറ്റി പ്രൊട്ടക്ഷന്‍ - പിവിപി) നിയമം ലംഘിച്ചുവെന്നാരോപിച്ച് ഗുജറാത്തിലെ കര്‍ഷകര്‍ക്കെതിരേ നല്‍കിയ കേസ് പ്രതിഷേധത്തെത്തുടര്‍ന്ന്‌ പെപ്‌സികോ പിന്‍വലിച്ചു. ലെയ്‌സ് എന്ന ബ്രാന്‍ഡ് നാമത്തില്‍ പെപ്‌സികോ ഇന്ത്യയില്‍ വില്‍ക്കുന്ന ചിപ്പ്‌സ് ഉണ്ടാക്കുന്ന എഫ്‌സി 5 എന്ന ഇനം ഉരുളക്കിഴങ്ങ് ഈ കര്‍ഷകര്‍ അനധികൃതമായി കൃഷിയിറക്കിയെന്നായിരുന്നു കേസ്. പെപ്‌സികോയുടെ നടപടിക്കെതിരേ വ്യാപക പ്രതിഷേധമുയര്‍ന്നിരുന്നു.
ഗുജറാത്തില്‍ നിന്നുള്ള എട്ട് കര്‍ഷകര്‍ക്കെതിരേയാണ് പെപ്‌സി കോടതിയെ സമീപിച്ചത്. നാലുകര്‍ഷകരില്‍ നിന്ന് ഒരുകോടി രൂപ വീതം നഷ്ടപരിഹാരം ആവശ്യപ്പെട്ട് അഹമ്മദാബാദ് കോടതിയിലും മറ്റുകര്‍ഷകരില്‍നിന്ന് 20 ലക്ഷം വീതം നഷ്ടപരിഹാരം തേടി മൊഡാസ കോടതിയിലുമായിരുന്നു പെപ്‌സികോയുടെ കേസുകള്‍. സബര്‍കന്ദ, ആരവല്ലി ജില്ലകളിലെ കര്‍ഷകരാണ് പെപ്‌സിയുടെ പരാതിയില്‍ കോടതി കയറേണ്ട അവസ്ഥയിലെത്തിയത്.