തിരുവനന്തപുരം: ഈ വര്‍ഷത്തെ കേരള എന്‍ജിനീയറിങ്, ഫാര്‍മസി പ്രവേശന പരീക്ഷകള്‍ (കീം 2019) ആരംഭിച്ചു.
എന്‍ജിനീയറിങ്ങിന് 93,467 പേരും ഫാര്‍മസിക്ക് 64,289 പേരും ഉള്‍പ്പെടെ 1,57,756 വിദ്യാര്‍ഥികളാണ് ഇക്കൊല്ലം പ്രവേശന പരീക്ഷ എഴുതുന്നത്. സംസ്ഥാനത്തെ 14 ജില്ലാ കേന്ദ്രങ്ങള്‍ക്ക് പുറമെ ദുബൈ, മുംബൈ, ഡല്‍ഹി എന്നിവിടങ്ങളിലായി 330 കേന്ദ്രങ്ങളിലാണ് പരീക്ഷ. ഫിസിക്‌സ്, കെമിസ്ട്രി പരീക്ഷകളാണ് ഇന്നലെ നടന്നത്. രാവിലെ 10ന് ആരംഭിച്ച പരീക്ഷ 12.30ന് അവസാനിച്ചു. രണ്ട് പരീക്ഷകളും പൊതുവേ എളുപ്പമായിരുന്നുവെന്ന് വിദ്യാര്‍ഥികള്‍ പറഞ്ഞു. ഫിസിക്‌സ് ആയിരുന്നു കൂടുതല്‍പേര്‍ക്കും എളുപ്പം.

രണ്ടുപരീക്ഷകളും സമയത്ത് എഴുതിത്തീര്‍ക്കാന്‍ കഴിഞ്ഞെന്ന ആത്മവിശ്വാസത്തിലാണ് വിദ്യാര്‍ഥികള്‍. ഇന്ന് കണക്ക് പരീക്ഷ നടക്കും. പ്രവേശന പരീക്ഷയുടെയും യോഗ്യതാ പരീക്ഷയിലെ ഫിസിക്‌സ്, കെമസ്ട്രി, കണക്ക് പരീക്ഷകളുടെയും അടിസ്ഥാനത്തിലാണ് റാങ്ക് പട്ടിക തയാറാക്കുക. മൂല്യനിര്‍ണയം ഉടന്‍ ആരംഭിക്കുമെന്ന് എന്‍ട്രന്‍സ് കമ്മിഷനര്‍ എ. ഗീത പറഞ്ഞു.

നേരത്തെ ഏപ്രില്‍ 27, 28 തിയതികളിലാണ് പരീക്ഷ നടത്താന്‍ തീരുമാനിച്ചിരുന്നത്. അത് മെയ് 2, 3 തിയതികളിലേക്ക് മാറ്റുകയായിരുന്നു. ഓണ്‍ലൈനായി അപേക്ഷിച്ച പരീക്ഷയുടെ പ്രിന്റ് ഔട്ടും അനുബന്ധരേഖകളും തപാലില്‍ അയക്കേണ്ടതില്ല എന്ന പ്രത്യേകത ഇത്തവണ ഉണ്ടായിരുന്നു.