തിരുവനന്തപുരം: ട്രിവാന്‍ഡ്രം സിറ്റിസണ്‍സ് ഫൗണ്ടേഷന്റെ (ടി.സി.എഫ്) ദശവാര്‍ഷികാഘോഷത്തിന്റെ ഭാഗമായി ഏര്‍പ്പെടുത്തിയ ബെസ്റ്റ് ടീച്ചര്‍ അവാര്‍ഡ് ഡോ. സെയ്ത് സല്‍മയ്ക്ക് സമര്‍പ്പിച്ചു.

തിരുവനന്തപുരം പ്രസ് ക്ലബ് ഹാളില്‍ ഇന്നലെ നടന്ന ടി.സി.എഫ് വാര്‍ഷിക സമ്മേളന ചടങ്ങില്‍ മന്ത്രി എ.കെ ശശീന്ദ്രനാണ് പുരസ്‌കാരം സമര്‍പ്പിച്ചത്. ആതുരസേവനരംഗത്തെ മാലാഖമാരെ വാര്‍ത്തെടുക്കുന്നതില്‍ സല്‍മയെപ്പോലെയുള്ളവരുടെ സംഭാവന രാജ്യത്തിന് മുതല്‍ക്കൂട്ടാണെന്ന് മന്ത്രി പറഞ്ഞു.

സെയ്ത് സല്‍മയ്ക്കുള്ള പ്രശസ്തി പത്രം പി.ടി.എ റഹീം എം.എല്‍.എ സമ്മാനിച്ചു. സ്റ്റേറ്റ് റിസോഴ്‌സ് സെന്റര്‍ ഡയറക്ടര്‍ ഡോ. എന്‍.ബി സുരേഷ്‌കുമാര്‍ അധ്യക്ഷനായി. മുന്‍ പ്ലാനിങ് ബോര്‍ഡ് അംഗം സി.പി ജോണ്‍, കേരള നഴ്‌സിങ് കൗണ്‍സില്‍ രജിസ്ട്രാര്‍ വല്‍സ കെ. പണിക്കര്‍, ജിഷ്ണു ജെ രാജ്, ഇ.കെ മുഹമ്മദ്, എം. ഷാജഹാന്‍, എം.എ റഹീം പങ്കെടുത്തു.