ടെക്‌സാസ്: വിഖ്യാത ഹോളിവുഡ് ചിത്രമായ സ്റ്റാര്‍ വാര്‍സ് പരമ്പരയിലെ ച്യൂവി എന്ന ച്യുബാക്കയെ അനശ്വരനാക്കിയ ബ്രിട്ടീഷ് - അമേരിക്കന്‍ നടന്‍ പീറ്റര്‍ മെയ്ഹ്യു അന്തരിച്ചു. 74 വയസായിരുന്നു. ഏപ്രില്‍ 30നായിരുന്നു അന്ത്യമെന്ന് അദ്ദേഹത്തിന്റെ കുടുംബം മാധ്യമങ്ങളെ അറിയിച്ചു.

അദ്ദേഹത്തിന്റെ മരണകാരണമെന്തെന്ന് മെയ്ഹ്യു കുടുംബം മാധ്യമങ്ങള്‍ക്കു നല്‍കിയ പ്രസ്താവനയില്‍ വ്യക്തമാക്കിയിട്ടില്ല. വെനസ്വലയിലെ നിലവിലെ പ്രതിസന്ധി ഘട്ടത്തില്‍ അവിടുത്തെ പാവപ്പെട്ട കുട്ടികളെയും കുടുംബത്തെയും സഹായിക്കാനായി ഒരു ഓര്‍ഗനൈസേഷന്‍ രൂപീകരിച്ച് അതിന്റെ പ്രവര്‍ത്തനങ്ങളില്‍ ശ്രദ്ധകേന്ദ്രീകരിച്ചിരിക്കുകയായിരുന്നു അദ്ദേഹം.

ഹോളിവുഡ് നടന്മാരില്‍ ശരീരത്തിന്റെ ഉയരം കൊണ്ട് പ്രശസ്തനായ വ്യക്തിയാണ് പീറ്റര്‍ മെയ്ഹ്യു. 7.2 അടി (2.18 മീറ്റര്‍) ഉയരമാണ് ഇദ്ദേഹത്തിനുണ്ടായത്. ഇദ്ദേഹത്തിന്റെ ഉയരം കൊണ്ടും കൂടിയാണ് ച്യുബാക്ക ഇദ്ദേഹത്തെ തേടിയെത്തിയത്.